SADONG JAYA: Gaya politik di Malaysia enda nendurka semangat rayat ditu ngintu Kebangsaan, ku Adun Sadong Jaya Aidel Lariwoo.

Ku iya, sejarah menua merdeka mesti dikeingat semua rayat Malaysia laban sejarah tu meri semengat kelimpah kitai ulih idup likun enggau lantang.

“Pengudah menua tu udah merdeka, kitai ulih ngeranchakka agi pemansang ba Sarawak.

“Pengelantang diasaika kitai diatu berindik ari semengat beserakup pupu bansa kelebih agi bala ketuai ba genturung pendiau,” ku iya.

Aidel mansutka jaku nya lebuh bejadika Program Merdeka@Komuniti Daerah Samarahan ba DUN N24 Sadong Jaya diatur Opis Pemadah Malaysia (Pelilih Samarahan) di Dewan Terbuka, Kampung Sadong Jaya Laut, Pelilih Mit Sadong Jaya, ditu kemari.

Nambahka nya ku iya, semua piak udah bejalaika tanggungpengawa nyaga kaul penyerakup di Sarawak ngelama tu.
“Enti enda, udah tentu mayuh penanggul deka nyadi baka rayat deka pambar enggau ke bukai.

“Lebuh ngembuan semangat kemerdekaan tu, kami ulih nampung pengawa nyerakup rayat ba genturung pendiau lalu sama ngemansangka sitak kita ba misyen Merdeka ke sekali tu,” ku iya nerang.

Ba lansa sama, Aidil madahka iya udah nyuaka RM350,000 dikena nyeleti Dewan Terbuka, Kampung Sadong Jaya enggau deka dipejalai enda lama agi.

“Dewan tu deka dirumpang ngambi ditangkir besai agi ungkup pengelantang rayat ditu,” ku Aidil.

Berebak enggau nya, iya mega madahka sebuah stadium mit deka digaga ba Masjid Darul Iman ngena agih belanja RM13 juta ngambi ngeranchakka agi atur program enggau aktiviti ba sitak nya.

“Projek ti dikemansang ba sitak tu nitihka utai dikedeka kitai empu.

“Aku suah ngelempaika tanggungpengawa baka tu ngagai ketuai genturung pendiau ngambi beratika utai ke patut digaga ba genturung pendiau sida.

“Nya alai, kitai ulih madah projek kedeka kita laban aku udah ngiga enggau ngagihka belanja,” ku iya.

Sama datai Pemesai Pemadah Pelilih Samarahan Abdul Latip Shamsuddin, Pengari Direktor Pemadah Sarawak Mohamad Sahrizan Putit enggau Michael Awan sereta pengari bukai.