BETONG: Gerempung Indu ba renggat rumah panjai dipinta majak terus ditegap nentuka budaya enggau pesaka asal peranak rumah panjai ulih dijaga ungkup rebak dudi.

Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar, Datuk Gerald Rentap Jabu madah, pengawa negap pangku pengawa indu meseti dipun ari diatu ngambi budaya sereta pesaka komuniti Iban ulih terus dijaga.

Rentap madah munyi nya lebuh bejadi Pengawa Merarau serimbai Ngelanchar Gerempung Indu Rumah Semumok Atas di Balai Lumba Datuk Amar Stephen Kalong Ningkan, Betong, Hari Enam tu tadi. Ku iya, atur program baka merarau nya ukai semina meri peluang nyaga budaya enggau tradisyen peranak rumah panjai, tang mega nyadi pelasar ngedut kaul entara peranak kelebih agi ba Kunsil Nengeri (DUN) Layar. Iya mega muji pangku pengawa tuai rumah enggau gerempung indu di Layar ti semampai bekerejasama ba renggat baruh sereta bela besukung ngemujur bemacham program ti diatur rumah panjai bukai.

Nambah ke nya, iya ngelalau Gerempung Indu Semumok Atas ngemansang pengulih tanah diri empu ungkup aktiviti betanam betupi seraya ngelaku asil utai tanam nya dikena nambah penatai pemisi. Ku iya, Rumah Semumok Atas ti ngembuan penuduk strategik laban semak enggau mengeri Betong nya siti pengelebih ti ulih dikena ngerembai aktiviti ekonomi peranak menua.

Nangkan nya, Kaban Parlimen Betong, Datuk Dr Richard Rapu meri tabi puji ngagai Gerempung Indu Semumok Atas laban mujur ditumbuh, ti ukai semina mangku pengawa besai ba institusyen ruang bilik, tang mega ngemujur atur pengawa enggau pemansang komuniti ba renggat baruh.

Iya mega meransang raban indu regas agi ngambi bagi ba aktiviti ekonomi nyengkaum dagang, kelimpah ngena bemacham kus, woksyop enggau latih ti disediaka Perintah Sarawak, kelebih agi bekaul dagang online.

Ku iya baru, indu ti bisi pengelandik ngaga produk bepelasarka keranjai jari mega diperansang ngaul diri ba dagang online dikena nambah makit sereta ngelaku produk sida ngagai mayuh agi penguna.

Berebak enggau nya, Richard nangkan peranak ba Betong semampai nyaga pengerai diri maya penusah sebun tu baka ngena sengkabung mua enti ba luar rumah. Iya mega meransang rayat ngena Program Bejual Rahmah ti diatur ba Parlimen Betong nyerangkung DUN Layar, Bukit Saban enggau Saribas ngulihka barang diguna enggau rega ti mudah agi seraya nyaup ngelempung tating belanja.

Ba pengawa nya, Rentap enggau Richard bela ngagihka belanja RM5,000 ngagai Gerempung Indu Rumah Semumok Atas dikena nyukung aktiviti enggau gerempung nya. Seduai bela ngemendar peminta tong ai Komiti Pemansang enggau Pengelikun Genturung Pendiau (JKKK) Rumah Semumok Atas dikena nyamin bekal ai di rumah panjai nya.

Bela datai, Pegawai UKAS Bagi Menua Betong, Tony Malang, Penguasa Opis Tanah enggau Survei Bagi Menua Betong, TPr Moris Nayup, Pemancha Komuniti Iban Pelilih Betong, Pemancha Norman Ngumbang, Penghulu Sebastian Randy Khadam, Tuai Rumah Semumok Atas, Tuai Rumah Johnathan Lanjang enggau Chairperson Gerempung Indu Semumok Atas, Lia Ginchang. – EDISI UKAS