KUCHING: Bala tuai gerempung lumpa ti puntan mai penyulut ngagai tim diperansang nyurutka diri.
Sida patut meri peluang ngagai orang bukai ti bepenau sereta bisi pengulih nyadi tuai ngembing gerempung lumba nya.
Gerah nya dibantai Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah rambau bejaku ba Program Apresiasyen 2023 Kaunsil Lumba Sarawak (SSC) enggau Kaunsil Lumba Nengeri Sarawak (MSNS) ba Hikmah Exchange Event Centre (HEEC) malam ensanus.
Iya madahka diri irau laban gerempung lumba ba Sarawak agi nejuka bala tuai ti sebaka berengkah ari Lumba Malaysia (SUKMA) 2016.
“Tu sebengkah pengerugi laban sekeda gerempung agi dikuasa tuai ti sebaka taja bisi bukti mandangka sida puntan mai penyulut ngagai tim,” ku iya.
Karim ngaku, pelasar nya patut dipejalai dikena nentu semua gerempung lumba dikuasa SSC enggau MSNS ransing agi nyikap diri napi SUKMA XXI 2024.
Pekara nya mega, ku iya, beguna amat dikena ngangkat kualiti lumba Sarawak dudi hari.
