GIDSA: Nempa indu Sri Aman pegari ba semua sukut

Gerempung Indu Dayak Sri Aman tauka GIDSA, iya nya sebengkah gempung ukai dikuasa perintah (NGO) ti baru ditumbuh lalu deka dilanchar kena 27 April taun tu nyerumba Pengerami Mantar Gawai ti diatur sida.
Chairman GIDSA, Bonie Langkop madah, sekeda ari batang tuju sida numbuhka gerempung tu dikena ngangkatka tikas pengidup raban indu kelebih agi ba ruang bilik peranak menua pesisir di Sri Aman.

JULUK PEMANSANG

Ku iya, tu nyengkaum pemansang raban indu ba pengawa betanam betupi enggau bekebun ngaul kebun sabun, lada, getah, sayur, kulat, buah enggau pengawa bumai betaun ngena chara moden agi.

“Pengawa betupi tu bisi dua chara, nupi jelu ti dikandang enggau diteju lepas sebelah kebun sabun. Reti iya, baka kitai nupi jani, manuk, serati deka digaga sangkar tauka langkau endur kitai ngandang sida. Bebida pengawa nupi besai baka chapi, bedus tauka ke bukai ulih dilepas kitai makai daun babas sebelah kebun.

“Kitai mega tau nupi ikan pegung tauka ikan sangkar baka ti dikereja peranak tunga Batang Ai. Mujur amat peda mata aku, dagang ikan idup ti dijual ba tamu ujung minggu matak penatai mensia mayuh napatka palan nya.

“Kelimpah ari ikan, kitai mega tau nupi undang, ketam, lukan tauka bansa pemakai tasik ke bukai ti ulih idup ba ai ti dikandang enggau ai anyut baka pegung enggau sungai,” ku Bonie nerang silik.

Bonie tu siku pekebun lada chunto ba Batang Undop, iya nya peranak asal Sebujuk, Ulu Paku Undop. Iya chakah gawa ngemansangka pengawa betanam betupi sereta mujur amat nyadi pekebun lada enggau sabun sereta pemujur iya ditelaban raban indu bukai ba menua nya.

NGAJIHKA MANSANG: Chairman GIDSA, Bonnie (lima kanan), disempulang Norina (tiga kiba), Ketuai Pemadah GIDSA, Yen Jebeni (empat kanan) enggau bala bukai pengudah baum enggau bepilihka komiti GIDSA apin lama ke udah.

PELUANG NGAUL PENGAWA DAGANG

Sepenemu enggau Bonie, penyanding penemu ti mega pemungkal gerempung tu, Norina Umoi Utot, madahka peluang raban indu ngaul diri ba pengawa dagang menua besai amat. Bepun ari pengelandik jari nyentuk dagang ngena penau nganta, ngelagu buk enggau ke bukai endang nerima peminta tinggi ba makit kemaya hari.

“Kitai indu endang diberi petara pengelebih enggau penau nempa, nengkebang enggau mansutka asil ari pengawa dikereja kitai besehari sehari. Kelimpah dikena diri empu enggau kitai sebilik, kereban tauka utai ditempa kitai tau mega dijual lalu ulih mansutka belanja tambah ngagai kitai empu.

“Penau ngaga bemacham bansa kuih, nusuk manik, ngebat, nenun enggau pengelandik jari ke bukai chukup manah nyadika produk dagang kitai lalu diatu udah bisi makit besai ba menua tasik nengah atur ekspo tauka pengawa mandang besai ti diatur ungkup raban orang dagang.

“Pia mega dagang nyendiaka servis nganta, ngelagu buk, ngatur servis melah piang nyengkaum ngaga panggau endur beterang ngena macham bansa pengias diatu endang laku amat. Enda tinggal mega produk dagang temuai baka rumah temuai tauka homestay mega majak ngerembai diatu,” ku iya ti teulihka pemujur ba pengawa nanam sabun, lada kelimpah kebun buah ti dikereja iya empu.

REGAS: Bonnie ti nyadi pekebun lada chunto ba Batang Undop meri peransang ngagai raban indu bukai.

Kitai indu mega ku Norina, abis nadai ngembuan pengangkun ba pelajar, nadai ngira pelajar ba sekula tauka ngambi pelajar ba luar baka ngulu kus, seminar enggau bengkel dikena nambahka penau enggau ngiri penemu baru.

“Ukai reti kita ti udah badu besekula, nadai batang pengawa kelebih agi raban indu ti gawa ngintu ruang bilik, patut ngelengka pengangkun kita pengawa ti udah disebut aku tadi.

“Kita patut liat ati sereta kering semengat belajarka sebarang penemu dikena nyikap diri besemekih enggau bala bukai ba pengawa diangkunka kita. Ambika chunto, diatu mayuh kus enggau seminar diatur raban ari opis, ejensi tauka NGO ti bekaul ti meri peransang ngagai kita chakah ngaul diri.

“Ari penemu, latih enggau ajar ti diulih maya ngulu kus enggau seminar tu, kita ulih nengkebang kereban ti nyelai ari enggi orang, chura dipegulai ti tampak enggau gaya ukir asal kitai diambi lalu ditunda,” ku Norina nampung.

CHAKAH BA PENGAWA NGO

Kelimpah ari kaul pengawa ngemansangka diri, kitai indu mega enda tinggal dilempai pangku pengawa nyukung enggau besaup gawaka bansa nengah NGO. Nya kebuah GIDSA tu ditumbuh.

“Ba NGO tu, kitai deka nanggam kaul rat agi begulai enggau pangan diri, betulung enggau besaup gawa. Pengawa berat deka nyadi lempung, pengelantang sida ti tadah deka diintu meruan, raban seranta deka ditulung ngambika badu merinsa nengah kaul pengawa ti patut sereta mayuh pangku pengawa bukai ulih dikereja begulai dalam gerempung.

“Kitai indu mega deka tegap enggau teguh agi penuduk enti bisi pelasar endur kitai bediri ngentapka penemu enggau peminta ti nyamin pemansang begulai pulaika pemaik semua.

“Tetak leka dabai, kitai indu anang enggai nguji, anang bisi ati sanggu belajarka penemu baru sereta bisi pengeran meransang diri maju ke mua,” ku Norina nyimpul randau kami tiga.

Ngelansa pasal Pengerami Mantar Gawai GIDSA ti keterubah deka diatur kena 27 April 2019, kena lemai Hari Enam, bepalan ba Restaurant Eden, Sri Aman ke alai patron tauka tuai pengabang dikangau malam nya iya nya bini Menteri Kereja Raya Baru Bian, Yu Ching Sieu lalu gaya gari dikena malam nya ditetapka ngepan asal bansa Dayak.

BEREJISTER BA ROS

Nitih ku penerang, Komiti GIDSA ti udah dipadu gawa diatu benung kiruh ngatur gerempung tu rejista ba Opis Pengerejister Gerempung (ROS) ngambika gerah sida ngatur sebarang langgur aktiviti ungkup raban indu di Sri Aman jemah.

Sekeda ari program ti udah dilangkar sida rambau aum keterubah deka ngatur pengawa mandangka chara ngaga kuih tauka bun ti deka dikenatai Rachel Jali ari Empeli dalam bulan Mac tu.

Udah nya sida merambu ngatur seminar nanam kulat dalam bulan April tu. Siku ari kaban GIDSA bisi gudang kulat ba Bakong, benama Tuai Rumah Rokiah Bansing, siku indu Iban ti biak amat mujur ba pengawa dikereja iya. Ba gudang nya, iya bisi ngeluarka paung kulat.