KM andal Sarawak ulih nyadi nengeri pemadu maju manggai taun 2030
“Kami (GPS) ngembuan juluk ti manah dikena ngemansangka nengeri tu nyadi siti ari nengeri ti pemadu maju ba taun 2030.”
SIBU: Kepala Menteri Datuk Patinggi Abang Johari Tun Openg andal Sarawak ulih nyapai visyen iya nyadi sebuah nengeri ke pemadu maju ba menua tu manggai taun 2030.
“Pekara tu bepelasarka tanggungpengawa kolektif bala parti komponen Gabungan Parti Sarawak (GPS) baka parti PBB, SUPP, PDP enggau PRS,” ku iya lebuh bejaku ba Pengerami Ramah Tamah Gawai Raya Bagi Menua Sibu 2019 di Taman Selera Harmoni, ditu malam kemari.
“Kami ba GPS enda belaya tang fokus ngagai politik pemansang.
“Kami (GPS) ngembuan juluk ti manah dikena ngemansangka nengeri tu nyadi siti ari nengeri ti pemadu maju ba taun 2030,” ku iya bejaku ba mua urung 3,000 iku ti datai ngulu pengerami nya.
Bisi datai ngulu pengerami tu iya nya bini iya, Datin Patinggi Datuk Amar Juma’ani Tuanku Bujang, Sapit Kepala Menteri Datuk Amar Douglas Uggah Embas, Menteri Muda Pelajar enggau Pansik Dr Annuar Rapa’ee, Menteri Muda Jalai Persisir Datuk Julaihi Narawi, Menteri Muda ba Opis Kepala Menteri Sharifah Hasidah Sayeed Aman Ghazali sereta bala Menteri ke bukai.
Abang Johari madah, parti komponen dalam GPS ngembuan tanggungpengawa kolektif dikena mai pemansang ti meruan ngagai menua.
“Kitai nadai politik baka ba Semenanjung Malaysia laban GPS ngembuan juluk kediri empu ti deka dijapai.
“Nya alai, GPS deka seruran nyaga pengelikun nengeri tu ngambika ulih nempa penyerakup ngagai bala rayat,” ku Abang Johari.
Seraya madahka juluk GPS diatu benung ngiga inisiatif deka nyungkak ekonomi rayat ba nengeri Sarawak.
“Mayuh bengkah inisiatif ti deka digaga ngambika visyen tu ulih dijapai lalu semua tu endang nyelinting pengelantang rayat kelimpah dikena nyungkak ekonomi rayat ba nengeri tu,” ku iya madah nyemetak.
Iya besemaya deka ngaga mayuh agi perumahan rakyat mampu milik dalam dalam timpuh dua taun ke deka datai.
“Kitai mega deka ngemansangka sereta nyemelaka menua pesisir baka ba mengeri baka karan, ai enggau perengka guna iya,” ku iya.
Abang Johari madah, GPS ngembuan perambu ti engkeman lalu langgur politik dikena dalam pemansang negeri ukai belaya enggau pangan diri.
Ngelansa pasal mengeri Sibu, iya madah perintah deka ransing agi ngemajuka mengeri Sibu.
Kelimpah ari nya, perintah nengeri deka merambu ngaga mayuh agi perumahan rakyat mampu milik lalu meri perati dalam pengawa betanam betupi seriris enggau pemansang teknologi digital.
Abang Johari mega madah, perintah endang nyelinting dua pekara tu baka nyual pemakai sereta ngemajuka tanah mega ngembuan peluang besai dikena nyungkak ekonomi rayat.
Nangkanka nya, dana tu ulih dikena Sarawak ngaga mayuh bengkah inisiatif dikena ngangkatka ekonomi rayat.
Iya nambah, GPS seruran beratika nasip rayat ba nengeri tu ngambika ulih idup lantang sereta likun.
“Semua tu deka digaga dalam kandang dua taun lalu merambu mayuh agi ekonomi, perumahan enggau pekara bukai ungkup rayat nengeri tu.
“GPS enggau naka ulih ngemansangka menua enggau meri pemaik ngagai rayat,” ku iya nambah.
Berebak ari nya, Abang Johari ngingatka rayat ba nengeri tu ngambi nyaga pengelantang enggau penyerakup pupu raban bansa ti lama udah dikemeran kitai.
