Pekara ke ngasuh saru iya nya Presiden PSB madahka sida nyukung Kepala Menteri
“Ngarapka pemesai GPS madah enggau terang sekalika nerima tauka enda PSB tu.”
SIBU: Pemesai ba Gabungan Parti Sarawak (GPS) patut ngaga pemutus baikka nerima Parti Sarawak Bersatu (PSB) tauka enda.
Kaban Kunsil Nengeri (ADUN) Tamin Ir Christopher Gira Sambang madah, iya saru meda penerang ke dibantai Presiden PSB Dato Sri Wong Soon Koh ti madahka PSB nyungkung Kepala Menteri Datuk Patinggi Abang Johari Tun Openg.
“Iya (Wong) madah diri nyukung tang iya enda kakang ngachau raban komponen GPS baka Parti Sa’ati Rayat Sarawak (SUPP), Parti Progresif Demokratik (PDP) tauka ‘ngambi’ Kaban Parlimen (MP) Parti Rayat Sarawak (PRS).
“Ngarapka pemesai GPS madah enggau terang sekalika nerima tauka enda PSB tu,” pia ku iya madah nengah penerang, kemari.
Ba surat berita ensana, Wong madah, PSB deka sama singkang begulai enggau perintah Sarawak ti betuaika Abang Johari ngaduka pemansang.
Soon Koh mantaika jaku nya maya ‘road show’ PSB ke diatur di Dewan Dr Johnical Rayong, Engkilili.
Nambahka jaku iya, ku Gira, ngelama tu mega GPS endang suah meri kelai deka nerima PSB sebilik enggau sida.
Tang ku iya, PSB nadai kala nganjung peminta deka segulai dalam GPS.
“Ukai semina nya, PSB nyau bemain politik kering penemu kelimpah ngachau parti komponen GPS sereta bekenaka ‘imuniti,” pia ku iya madah baru.
