KUCHING: Gempung Parti Sarawak (GPS) udah sedia napi Pengawa Bepilih Mit (PRK) Kunsil Nengeri (DUN) Jepak ti deka diatur kena 4 November 2023.
Chairman nya, Datuk Patinggi Tan Sri Abang Johari Tun Openg madah, sida deka nganjung chalun ti dipilih lebuh hari ngantung nama chalun ti udah ditetapka kena 21 Oktober tu.
Taja pia, Premier Sarawak nadai madah silik bekaul nama chalun ti deka bediri minta pilih ba sitak nya ila.
“Kitai deka nyikap diri, ba hari ngantung nama chalun, kami deka nganjung chalun meh…udah nya kita (rayat Jepak) deka ngundi baka selama,” ku iya.
Abang Johari bejaku munyi nya rambau aum pemberita pengudah bejadi Program Gempuru Antarabansa Keterubah Bioteknologi, Betanam Betupi Pintar enggau Dagang Pengelikun Pemakai (BIOSFE 2023) di sebuah hotel ditu, tadi.
Iya dipinta ngelansa pekara tu pengudah aum media Komiti Besai Pengawa Bepilih (SPR) ti ngeletak 4 November nyadi haribulan ngundi PRK DUN Jepak lalu hari ngantung nama chalun ditetapka kena 21 Oktober seraya hari ngundi tumu kena 31 Oktober enggau haribulan writ kena 25 September.
