KOTA SAMARAHAN: Program Mobiliti Nembiak Antarabansa nyadi siti tanggungpengawa dikena nyukung tuju Universiti Teknologi MARA (UiTM) Sarawak ngetan kaul kerejasama strategik sereta nempa graduet ke ngembuan penemu global.
Rektor UiTM Pampang Sarawak, Profesor Dr Firdaus Abdullah madah, kerejasama enggau Universiti Nasional Singapore (NUS) meri peluang berega ba pengawa besilih penemu bekaul akademik nyengkaum sukut ngajar, belajar sereta pansik.
Ku iya, ba dunya ti majak maju diatu, nembiak ukai semina patut nyulut ba akademik, tang mega patut ngembuan pemereti ati ba adat asal, nemu neleba kediri enggau gaya idup baru sereta ulih gawa ba menua bukai begulai enggau pupu bansa.
“Nengah kerejasama enggau Universiti Malaysia Sarawak (UNIMAS), program taun tu besai endar reti laban ulih ngempung tiga institusyen tu lalu bekunsi penemu bekaul enggau adat, pengawa begulai enggau komuniti sereta pemansang menua.
“Kerejasama tu mega ngayan pemesai reti gawa begempung dikena nambah penemu ti bekualiti agi ngagai raban nembiak.
Dr Firdaus bejaku munyi nya nengah teks ti dibacha Sapit Rektor (Pansik enggau Rentayan Industri), Profesor Ir. Dr Juferi Idris serimbai enggau Program Mobiliti Nembiak Antarabansa entara NUS, UiTM Sarawak enggau UNIMAS ba UiTM Pampang Sarawak, Kampus Samarahan 2, kemari.
Ku iya, program mobiliti tu ukai semina dikena belajar, tang siti chara dikena ngansah runding, belajar penemu baru, bebasa ke raban bansa bukai sereta ngetan pemesai guna adat asal.
“Iya madah, UiTM Sarawak seruran ngenulu kaul antarabansa enggau nempa peluang ungkup pengajar sereta nembiak begulai enggau institusyen menua luar.
Taun nyin tadi, UiTM Sarawak mujur nanggam kerejasama enggau sekeda institusyen antarabansa baka Zhejiang Ocean University enggau Guanxi Minzu Normal University di menua China, Universitas Gadjah Mada (UGM) enggau Universitas Trisakti di Indonesia, Tokyo Metropolitan University (TMU) enggau Osaka University di menua Jipun sereta Universiti Brunei Darussalam.
Pia mega, bisi raban nembiak dibai ke Dublin, Ireland ungkup program main asal dikena ngerembai sereta mandang pemanah Sarawak.
Program Mobiliti Nembiak Antarabansa udah mujur diatur lalu udah datai ba taun keempat.
Tu mandangka kaul kerejasama ke majak tegap entara tiga institusyen tebilang ba Asia Tenggara.
Edisyen 2026 tu nyadi siti pelasar berega dikena ngenulu ke adat asal sereta ngenuku identiti raban bansa nuju pemujur ekonomi, dikemujur komuniti enggau pengawa nyaga rampa menua.
Program tu digulu empat pengajar sereta 27 nembiak Universiti Nasional Singapore (NUS) Kus Adat Asal enggau Pemansang Meruan di Asia Tenggara enggau 14 nembiak ari UNIMAS.
