KUCHING: Pemutus peresa Sijil Pelajaran Malaysia (SPM) Sarawak 2024 nempa sejarah pengudah dirikodka nyadi ti pemadu manah enggau Gred Pukulrata Nengeri (GPN) 4.84, kenyau ari netapka subjek Jaku Melayu enggau Sejarah nyadi subjek enda tau enda pas.
Tambah mega, GPN nya nambah 0.008 peratus dibanding GPN 4.92 ti dirikodka ba taun 2023, pemadu manah ba timpuh 12 taun.
Ku Menteri Pelajar, Inovasyen enggau Pemansang Penau, Datuk Seri Roland Sagah Wee Inn, bisi 30,341 chalun nyengkaum 94.11 peratus bulih setipikit SPM, enggau syarat meseti pas abis nadai dua subjek ti enda tau enda pas iya nya Jaku Melayu enggau Sejarah.
“Tu nambah 0.96 peratus dibanding SPM 2023 ti ngerikod 93.15 peratus chalun ulih nerima setipikit SPM.
“Tu mega rikod pemadu manah ba penyampau chalun ti ulih nerima setipikit SPM kenyau ari netapka atur baru ba taun 2013.
“GPN taun tu mega pemadu manah ungkup Sarawak, kenyau ari subjek Jaku Melayu enggau Sejarah ditetapka nyadi subjek enda tau enda pas SPM berengkah ari taun 2013,” ku iya ba aum pemberita mantaika pemutus SPM 2024 ungkup Sarawak, ditu tadi.
