MUKAH: Projek Sambung Grid Kuasa Karan ungkup Sekula Menua Pesisir ba Sarawak nya siti ari inisiatif timpuh panjai Perintah Sarawak negap infrastruktur pemun pelajar.
Menteri Pelajar, Inovasyen enggau Pemansang Penau Sarawak, Datuk Seri Roland Sagah Wee Inn madah, projek ti belabuh dipejalai ba taun 2018 nya nengah agih belanja Langgur Pemansang Malaysia Lumpar Ke-11 (RMK-11).
“Projek tu mega dikemendar sepenyampau RM50 juta enggau ungkus projek sepenyampau RM38,481,796.71 ti meri pemaik ngagai 122 sekula menua pesisir ba selampur Sarawak.
“Dikena nentuka atur ti nemban, projek tu dibagi ngagai lima pakej nyerangkung sekula ba mayuh sitak menua pesisir enggau menua ulu,” ku iya.
Sagah madah munyi nya lebuh bejadi Pengawa Nyua Projek Nyambung Grid Kuasa Karan ke Sekula Menua Pesisir ba Sekula Primari (SK) Sungai Duan, ditu kemari. Ngenang silik, iya madah ke projek nya belabuh ba taun 2020 enggau tembu ba taun 2025.
Iya mega madah ke projek nya napi penanggul laun ketegal pandemik COVID-19 tang nengah kerejasama entara ejensi sereta pengeran begulai, projek tu mujur digaga.
Berebak enggau nya, Sagah nyemetak madah, perintah nengeri keran nentuka akses pelajar ti asi, inklusif enggau bisi kualiti nadai ngira penatai, tirai juru sosioekonomi tauka pemar geografi.
“Perintah Sarawak mega ngemerat pelajar Sains, Teknologi, Injiniring enggau Matematik (STEM) enggau ngena Jaku English ngambi tetangkupka peminta pengereja pengawa dudi hari.
“Kededua pekara nya beguna amat ngagai pengelaku graduet, penau inovasyen sereta pemansang industri Sarawak dudi hari,” terang iya.
Ku iya agi, semua raban bekaul ngena manah fasiliti ti disedia dikena nambah kualiti ngajar, ngerembai pengawa belajar digital enggau narak budaya penyulut akademik.
Sama datai, Sapit Menteri Pelajar, Inovasyen enggau Pemansang Penau Sarawak, Datuk Dr Annuar Rapaee, Direktor Pelajar Sarawak, Omar Mahli, Direktor Bekal Kuasa Karan, Opis Menteri Utiliti enggau Telekomunikasyen Sarawak, Ir. Ts. Muhammad Randie Abdullah enggau Mandal Presiden Kanan, Pengerai, Sekuriti enggau Rampa Menua Sarawak Energy, Marconi Madai. – NUR FARIHAN RAZALI
