BINTULU: Nembiak Primari Enam SK St. Anthony, Ling Guan Yee dikemegah pengudah nama iya disebut Menteri Besai Tan Sri Muhyiddin Yassin entara nembiak nyulut ba menua tu.
Guan Yee begulai enggau dua agi bakih iya, Nathanael Lim Yee Ning enggau Ling Yan Ru ari Sekula Bansa China (SJKC) Kai Ming ditu kala bulih midul emas ba Pekit Inovasyen Pemandang Teknologi, Inovasyen enggau Langkar Tengkebang, Harta Intelek Entarabansa 2020 ba Bangkok, Thailand kena 6 Februari tu tadi.
Entara pemujur Guan Yee iya nya nyereta WAGGS World Centres Online Campfire kena 19 April tu tadi kelimpah kala nyereta Pekit Ngelinsu Renggat Nengeri diatur Gerempung Buddha Sarawak beserimbai enggau Hari Wesak, apin lama ke udah.
Diatu, penerima Anugerah Nembiak Nyulut Ko-Kurikulum Renggat Pelilih, Nengeri enggau Nasional tu benung nyereta GG Stay At Home Challenge Renggat Nasional diatur Serakup Pandu Puteri Malaysia ti berengkah diatur kena 7 April ngagai 15 Jun tu.
Kepala Pengajar sekula nya, Francis Dampa ngarapka pemujur Guan Yee deka nyadi peransang enggau chunto ngagai nembiak bukai.
Ku Dampa, iya berasai temegah lebuh nama sekula enggau nembiak iya disebut Tan Sri Muhyiddin Yassin lebuh meri penerang khas beserimbai enggau Hari Pengajar berambaika jaku, ‘Berguru Demi Ilmu, Bina Generasi Baharu’ taun tu.
Kelimpah ari SK St. Anthony enggau SJK Kai Ming Bintulu, Menteri Besai mega temegah enggau penyulut Tim Vincera ari Sekula Sekondari (SMK) King George V, Negeri Sembilan bulih lumur dua Land Rover 4×4 in Schools Technology Challenge, World Finals 2019, di United Kingdom (UK).
Tan Sri Muhyiddin Yassin mega ngenang pemujur atlit gimnastik nasional, Izzah Amzan ti mega nembiak ba Sekula Lumba Bukit Jalil nengah pemujur bulih dua midul emas enggau siti midul pirak ba Lumba SEA 2019 di Philiphines.
