SIBU: Perintah naka ulih mantu rayat awakka sida ulih ngidupka diri nengah bantu ke diberi.
Senator Robert Lau Hui Yew madah, pekara nya tepulai ngagai rayat baka ni deka nguna bantu ke udah diberi perintah.
“Ambika banding bantu wang diberi ngagai bala pekebun mit enggau ke bukai. Rayat patut nguna bantu nya enggau manah nyadika puku meli perengka ngasilka sesebengkah produk.
“Anang salah guna bantu perintah ungkup tuju bukai kelimpah dikena ngerembaika dagang kita.
“Perintah semina mantu lalu ke bukai nya bepanggai ngagai jari kita ngena bantu ke udah diberi nya,” ku iya rambau Program Ketuai Begulai Enggau Rayat ba Rumah Veronica, Sungai Pasai ditu kena Hari Enam tu tadi.
Ba pengerami nya, Lau mega bisi nyuaka 300 kampit simen tulung ari SUPP Bawang Assan ngagai Rumah Veronica.
Bantu nya dikena ngemanah rumah panjai urung 20 pintu nya ke bepalan urung 20 kilometer ari pasar Sibu.
Lau madah perintah sigi bebendar mantu rayat ke tusah.
Ku iya, tu nyengkaum rayat ke diau ba menua pesisir dijamin enda tinggal nerima bantu ari perintah.
“Perintah sigi ngungkupka semua bantu lalu ngarapka rayat ulih ngena iya enggau manah.
“Anang sesekali kita salah guna bantu laban tau pulaika pengerugi ngagai kita empu,” ku iya.
