PUSA: Pengandal Kepala Menteri Datuk Patinggi Abang Johari Tun Openg sereta Perintah Sarawak ngagai sitak Beting Maro ngambi terus dikemansang enggau industri apong enggau nanas patut dikena enggau manah.
Kaban kunsil Nengeri (ADUN) Beting Maro Razaili Gapor madah, DUN Beting Maro enggau Pelilih Pusa bepalan ba sitak tibang pemakai nengeri ke ngembuan penau besai.
“Abang Johari udah ngandalka kitai merambu pemansang industri apong enggau nanas.
“Tu peluang ke chukup manah endur kitai ngemansangka sektor betanam betupi enggau lebih agi agro pemakai…lalu aku andal tu peluang kitai ba sitak tu chukup besai,” ku iya.
Iya madah munyi nya rambau program Jom Berambeh @ Parlimen Batang Lupar berambaika jaku ‘Kamek Sayang Sarawak’ di Dataran Tandang Sari, kemari.
Tandu Razaili, perintah nyendiaka agih besai ungkup tuju nya.
“Ungkup kitai ba Pelilih Pusa, tu peluang ke dianti. Maya bisi peluang anang semina merati,” ku iya.
Taja pia, semua tu enda ulih diasai enti nadai sebuah perintah enggau ketuai ke ngembuan juluk ke tampak deka ngemansangka nengeri maju manggai taun 2030.
“Nya alai, kitai deka rayat nyukung iring Abang Johari dikena ngubah enggau negapka pengelantang awakka Bumi Kenyalang terus likun sereta lantang,” ku iya.
