KUCHING: Chairman Kaunsil Mengeri Padawan (MPP) Lo Khere Chiang nerima manah gerah Kaunsil Pengelikun Menua (MKN) pasal atur enda tau enda ngena sengkabung mua ba palan mensia mayuh bepun 1 Ogos tu.
Ku iya, pekara nya manah dipejalai laban ulih mantu mutuska pengerekai Covid-19 ba menua tu.
“Ambika banding, sengkabung mua tu ulih mantu ngurangka kes dirikodka ari mayuh kes nyentuk nadai kes enggau ke bukai,” ku iya.
Khere Chiang mansutka jaku nya lebuh dirandau pemberita pengudah nyuaka pemeri ba Sekula Bansa China (SJK) Chung Hua Batu 10, ditu kemari.
Terang iya, sida seruran nganti gerah ari Opis Penyangga Penusah Ngenyit Nengeri (JPBN).
“Pengudah JPBN ngeluarka gerah, kami (MPP) begulai enggau ejensi bukai deka besedia neritka atur.
“Kami mega mesti ngembuan disiplin ngambi nagang enggau munaska pengerekai Covid-19,” terang iya.
Ku Khere Chiang, iya berasai gaga meda mensia mayuh kelebih agi ba sitak MPP laban semua sida bekena sengkabung mua lalu tu pekara ke patut diadu sida diatu.
“Taja pia, aku ngelalau mensia mayuh anang mua sengkabung mua ti udah dikena sebarang alai.
“Anang ngereja ulah baka tu laban kitai irauka igi penyakit ngerekai enggau ke bukai,” ku iya.
