SERIAN: Penyereta Program Input Projek Betupi dipinta nyaut peminta ti ngasuh sida nyadi orang betupi ti mujur ngena teknologi ke pemadu baru (moden).

Menteri Muda Betanam Betupi Moden, Tanah Adat enggau Pemansang Kandang Menua, Datuk Roland Sagah Wee Inn minta bala penyereta bebendar ngemansangka projek betupi diri nengah bantu ke udah diberi perintah.

Ku iya, nya dikena nyungkak penatai pemisi diri sereta nyaup ngemansangka ekonomi Sarawak.

Ku Sagah, kira RM 2,174,000 agih belanja ungkup Dun Tarat, Kedup enggau Bukit Semuja diterima 150 penyereta Agriculture Facilitation Program (AFP)

Kelimpah nya, bisi RM160,000 udah diagih ngagai 16 penyereta Program Kebun Betupi Komersial.

“Agih belanja nya endang agih khas ari Perintah Sarawak dikena mantu orang betupi ngemansangka projek betupi sereta nambahka penatai pemisi sida.

“Perintah meri chukup mayuh bantu nyengkaum bantu ari opis veterinar dikena mantu ari sukut servis,” ku iya rambau Pengerami Nyuaka Input Projek Betupi Ungkup Dun Tarat, Kedup enggau Bukit Semuja di sebuah hotel ditu kemari.

Bela datai Adun Kedup, Martin Ben, Adun Bukit Semuja, John Ilus, Direktor Opis Servis Veterinar Sarawak, Dr Adrian Susin Ambud, Residen Serian Tuah Suni enggau Menijar Besai Kaunsil Pemansang Tanah Sarawak, Siang Mandaw.

Adun Tarat nya mega madah Opis Servis Veterinar Sarawak Bagi Menua Serian deka ngagihka semua input ke bekaul ngagai penyereta lalu matau semua pengawa pemansang infrastruktur sereta pekara bukai ke bekaul.

Berebak enggau nya, Sagah meransang bala penyereta bela nyaga utai tanam sida enggau manah.

Ku iya penyereta diperansang nguji bidang betanam betupi ngena perengka teknologi ke pemadu baru.

Tandu iya, Opis Menteri sigi meransang pengawa nguna teknologi moden ba pengawa betanam betupi.