KUCHING: Palan Penyangkai Kapal Bintulu bisi pengulih besai ngemanah agi operasyen nengah chara nyadi penyambung pemindah barang ngagai Kalimantan.

Sapit Menteri Besai ti mega Menteri Idar Kuasa enggau Transformasyen Ai (PETRA), Datuk Amar Fadillah Yusof madah, pekara tu lebuh nyaut tanya sentang pengulih Penyangkai Kapal Bintulu mansang nyadi hab serantau ti ulih ngurangka ungkus logistik rayat Sarawak enggau Sabah.

Ku iya, Palan Penyangkai Kapal Bintulu ti strategik nya ngasuh palan penyangkai kapal tu tau nyadi pintu penama besai pemindah barang ari Kalimantan.

“Taja pia, jalai ari Kalimantan jauh agi, nya alai siti ari inisiatif ti benung dipansik iya nya pemansang servis ‘kereta api’.

“Servis ‘kereta api’ nya ukai semina dikena nyambung Sarawak enggau Sabah aja, tang mega mungkur penyambung ari Kalimantan dikena ngepunka rentayan logistik meraka adan menua,” ku iya.

Fadillah bejaku munyi nya ba sebengkah randau lebuh Gempuru Besai Bajet Sarawak 2026 ba Palan Konvensyen Borneo Kuching (BCCK) ditu, kemari.

Ku iya, nengah rentayan nya, semua barang ari Kalimantan bisi pengulih dipindah nengah Palan Penyangkai Kapal Bintulu, ti ngujungka pengawa nya ulih ngangkatka operasyen palan penyangkai kapal tu diguna enggau optimum.

“Pansik pasal inisiatif nya udah dipejalaika lalu bisi mandang pengulih besai ungkup pemansang ekonomi enggau logistik pelilih menua.

“Enti inisiatif nya nyadi nyata, Palan Penyangkai Kapal Bintulu bisi peluang nyadi siti ari palan penyangkai kapal besai ti ngelaku produk ari semua adan nengeri,” ku iya.

Iya madah, inisiatif nya udah nerima pemendar seraya pengawa bejalaika nya diatu betuai ke Opis Menteri Pengangkut.

“Palan projek udah dikemendar lalu pansik silik benung dipejalai,” ku iya.