KUCHING: Hak politik ex-Bishop Anglikan, Datuk Bolly Lapok deka masuk Parti Sarawak Bersatu (PSB) lalu nya ukai penanggul laban iya udah pinchin, ku Menteri Muda Utiliti (Karan Menua Pesisir), Datuk Liwan Lagang.
Ku iya, Bup Kudus bisi nyebut pasal dua pekara sentang penemu sesiku orang bekaul enggau politik sereta perintah.
“Pemereti ati pasal pemendar nya deka nyaup kitai meda iya nya politik tu siti chara dikena Tuhan ngamatka peneka-Iya.
”Pelasar politik ukai penyelamat dunya, tang nyadi pengatur ngemendarka rayat kitai endur milih ketuai sida, enggau nyadi tanggungpengawa sereta meri pemaik ngagai orang ke arap milih,” ku iya maya dirandau Suara Sarawak, ensana.
Nangkan ke nya, ku iya peneka Tuhan masuk enggau ngelui ari semua sukut pengidup enggau pekara ke patut digenggam enggau dipereti iya nya orang ke arap deka nyadi penampak ngagai dunya enggau garam pengidup.
Ngelansa pasal Bolly Lapok ke mega ex-bishop Gerija Anglikan di Sarawak enggau tuai bishop Wilayah Anglikan Asia Tenggara masuk parti politik, Liwan nanya kati nya endang amat pengarap enggau politik enda bechampur?
Iya sempat nanya kati ulah enggau kaul siku orang ke arap dalam bidang politik enggau ulih kini penemu politik dipandangka ba luar pengarap Kristian?
Berebak enggau nya, Bolly, 69, madah iya bisi dikelalu parti politik bukai masuk parti sida, tang pengudah berunding, iya ngaga pemutus masuk PSB.
Bolly mega sedia madah mayuh orang tekenyit enggau pemutus iya masuk politik laban ngumbai mayuh orang ti ngelala pendiau iya endang siku orang ke kering ba pengarap Kristian.
