KUALA LUMPUR: Yang diPertuan Agong Sultan Ibrahim deka hak nengeri meseti semampai dibasa seraris enggau semangat Sempekat Malaysia 1963 (MA63) ti nyadi pugu penumbuh Malaysia ngaul Tanah Melayu, Sabah enggau Sarawak.
Baginda nyemetak madah ke pemaik Malaysia begulai meseti semampai dikemerat ba genap pekara enggau pemutus ti digaga.
“Nya kebuah, hak nengeri meseti semampai dibasa lalu pemaik Malaysia begulai meseti semampai dikemerat,” ku iya.
Sultan Ibrahim nibar jaku nya lebuh bejadi Pengawa Ngepun Aum Keterubah Penggal Kelima Parlimen ke-15, ditu ensanus.
Sama datai, Menteri Besai, Datuk Seri Anwar Ibrahim, dua Sapit Menteri Besai iya nya Datuk Seri Dr Ahmad Zahid Hamidi enggau Datuk Amar Fadillah Yusof sereta Yang Dipertua Dewan Rakyat, Tan Sri Johari Abdul enggau Yang Dipertua Dewan Negara, Datuk Awang Bemee Awang Ali Basah.
Baginda mega ngingatka genap pekara dipejurai, pemutus enggau undi ba Dewan Rakyat ukai semina nyeremin penemu politik parti tang mega nyadi penentu pemansang menua dudi hari.
Berebak enggau nya, Baginda ngingatka semua Kaban Parlimen bejimat maya bejuraika pekara enggau pengawa ngambi enda ngajum nyentuk penyarut entara kandang menua nyadi ti ulih ngeruga penyerakup menua.
“Sebarang penemu bebida entara nengeri enggau Perintah Besai meseti diputar chara manah bepelasarka semangat bebasa ke pangan diri enggau kerejasama rat lalu ukai nengah pemenchi tauka ati begedi,” ku iya nyemetak. – TVS
