SIBU: Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu tepantup ati meda pejalai Lumba Sarawak (SUKSAR) Ke-3 Sibu 2023 ba hari keterubah kemari.
Pekara nya dibantai iya lebuh meda penyulut tumu SUKSAR berebak ari kerejasama semua komiti teknikal lumba nya ti udah dichiri.
“Kitai tepantup ati meda pejalai lumba tu ba hari keterubah sehari tu (kemari).
“Aku meda semua tu berebak ari pangku pengawa komiti teknikal ti udah dichiri ba semua palan lumba tu,” ku iya.
Rentap mansutka jaku nya rambau ngemataka lumba angkat berat ba Balai Gerempung Melayu Melanau ditu, kemari.
Taja pia, ku iya, pengasi pangku pengawa bala komiti teknikal nya ulih dikena pengudah tu kelebih agi rambau Lumba Malaysia (SUKMA) XXI 2024 ila.
Dulu agi ari nya, iya bela magi awak diri ngelawa sekeda palan lumba sereta temegah ati meda semangat ti dipandang bala atlit ti ngarika empat zon nya.
“SUKSAR Ke-3 Sibu 2023 tu nyadi pelasar kepenudi kitai milih atlit ti deka dianjung ngambi bagi ba SUKMA XXI 2024 lalu aku temegah meda semangat ti dipandang semua atlit sekali tu,” ku iya.
