TANJUNG MANIS: Perintah Sarawak deka numbuhka hotel tiga Bintang ba Belawai dikena ngemansangka Tanjung Manis.

Premier Sarawak, Datuk Patinggi Tan Sri Abang Johari Tun Openg madah, kelimpah ari hotel, bemacham fasiliti bukai mega deka dikemansang nyengkaum padang golf ungkup pengusung ti minat lumba nya.

Kededua fasiliti nya, ku iya, deka dipejalai enggau dipasuk dalam Langgur Pemansang Malaysia Lumpar Ke-12 (RMK-12) seraris enggau pengawa nyendiaka fasiliti bekaul.

“Aku ngasaika sitak tu (Tanjung Manis) ulih maju ari sukut pemansang berindik ari bemacham inisiatif benung dipejalai perintah,” terang iya.

Abang Johari mansutka jaku nya ba Pengawa Nutup Safari Nginti Tanjung Manis, ditu tadi.