Iban mayuh gawa ke mengeri

Sida ngiga batang pengawa setipak enggau pengelandik diri

KUCHING: Pengawa puang ti mayuh ngujungka mayuh komuniti Iban ari menua pesisir bejalai lalu diau di mengeri tu.

Kepala Menteri Datuk Patinggi Abang Johari Tun Openg madah naka ke diatu gaya ekonomi ba mengeri ke lebih manah ngujungka komuniti Iban bejalai lalu ngiga belanja dikena ngidupka diri di mengeri besai tu.

“Diatu, nengah tikas pemandai sida ti majak tinggi ngasuh komuniti tu bejalai ke mengeri ngiga pengawa ti setipak
enggau pengelandik diri.

“Pengawa ti setipak enggau pengelandik nya semina bisi di mengeri aja seraya tu mantu nambahka asil ekonomi di
mengeri,” ku iya.

NYERADAK AI PENGAYU… Abang Johari enggau bala bukai nyeradak ai pengayu rambau Pengerami Gawai Ngiling Bidai ti
diatur ba siti hotel tebilang ditu kemari.

Abang Johari mansutka jaku tu lebuh bejadika Pengerami Gawai Ngiling Bidai 2019 ti diatur ba siti hotel tebilang
ditu, kemari.

Nangkan nya, iya madah naka ke diatu urung 80,000 iku komuniti Iban ditemu udah netap diri diau di mengeri tu.

“Komuniti Iban ti mindah ke mengeri tu mantu ngisi pengawa puang ti disediaka di mengeri lalu nambahka asil ekonomi.

“Pemansang dalam dunya ekonomi digital mai ubah ba dunya ekonomi kitai lalu komuniti makin nerima ubah tu,” ku iya madah.

Seraya ku Abang Johari, iya pechaya na sepuluh taun ti deka datai, iya ngasaika komuniti Iban ti diau ba mengeri
deka nambah ari ke dipeda diatu.

Ngelansa kenang sebedau merdeka, iya madahka nitihka statistik ba taun 1963 ngagai 1970, pemayuh komuniti Iban ti bisi diau di mengeri semina 30 peratus ari pemayuh rayat rambau nya suba.

Tang diatu, komuniti Iban enggau bansa Dayak ke bukai udah 65 peratus diau di bandar dibandingka diau di menua
pesisir.

Rambau pengerami nya mega, sepuluh iku nembiak ti nyulut ba peresa UPSR, PT3,SPM sereta Diploma taun 2018 nerima insentif penyulut.

Sama ngulu pengerami nya, Sapit Kepala Menteri Datuk Amar Douglas Uggah Embas enggau Tan Sri James Jemut Masing,Ex-Sapit Kepala Menteri Datuk Patinggi Alfred Jabu, Pemangku Sekretari Perintah Nengeri Datuk Jaul Samion sereta raban menteri ke bukai.

Suara Sarawak