KOTA SAMARAHAN: Industri dagang temuai enda ulih mansang enti nadai perengkaguna Arus Penyambung enggau Teknologi Pemadah (ICT).

Pengelicha Fakulti Ekonomi enggau Pengawa Dagang (FEB) Universiti Malaysia Sarawak (Unimas) Prof Dr Lo May Chiun madah, agi mayuh pemar ditapi industri dagang temuai menua pesisir ngambika ngerembai baka industri bukai di Sarawak.

“Ba jeman Revolusyen Industri 4.0 (IR4.0), pengelebih enggau pemansang ICT meri mayuh penguntung ngagai industri tu.

“Nengah pengelebih ICT, kitai bisi peluang ngerembaika dagang baru lalu nyendiaka servis ngagai bala temuai ngasaika peneleba teknologi baka Augmented Reality, Virtual Reality, video interaktif enggau ke bukai,” terang iya.

May Chiun madah munyi nya rambau licha keterubah iya ba pengawa ngelancharka bup Pengawa Ngatur Dagang Temuai Menua Pesisir di Sarawak di Palan Islam Tun Abang Salahuddin (Pitas) Unimas ditu, tadi.