KOTA SAMARAHAN: Rebak biak Lun Bawang patut terus diberi peneleba ngagai budaya, muzik, pemakai, adat enggau pengarap ti udah nyadi pugu pengidup komuniti ngambi pesaka enggau identiti sida terus dijaga.
Kaban Kunsil Nengeri (ADUN) Ba’Kelalan, Baru Bian madah, inisiatif nyaga enggau ngemeran adat sereta budaya Lun Bawang beguna amat laban penyampau tubuh komuniti nya di Sarawak enda mayuh.
“Adat enggau budaya tu nyadi pesaka ti chukup berega lalu patut ditan rebak diatu enggau dudi ngambi penemu sereta penyayau ngagai identiti Lun Bawang ulih ditampung rebak biak.
“Berebak enggau nya, Pengerami Malam Main Asal Lun Bawang Kuching tu beguna ukai semina dikena ngerami budaya kitai aja tang negap kaul kitai nyadi komuniti ti berega enggau nyelai,” ku iya. Baru bejaku munyi nya rambau Pengerami Malam Main Asal Lun Bawang Kuching 2026 ti diatur begulai komuniti Lun Bawang Kuching enggau Kelab Golf Lun Tau (KGLT) ditu, malam kemari.
Tampung iya, pengawa ngatur program main asal baka nya meri awak ngagai komuniti luar ngelala penyelai budaya Lun Bawang. Iya madah, nya nyengkaum pemakai asal, pemerindang seni enggau muzik ti nyadi sebagi ari identiti komuniti nya.
Nerang silik, ku iya, beguna amat ngetan pengelandik main Bamboo Band enggau kesuling ngambi seni muzik asal nya enda lenyau diserunyut jeman laban nya sebagi ari identiti Lun Bawang.
“Aku ngarap latih Bamboo Band enggau kesuling ti kala diatur sebedau tu ulih ditampung dikena negap pengawa rebak biak ba seni budaya komuniti Lun Bawang.
“Aku deka mantu ngulihka siti set Bamboo Band ti baru ungkup komuniti Lun Bawang di Sarawak kelebih agi ba Kuching. “Aku ngarap enti ulih, pampang kitai ba Kuching ulih nganjung pengari ba mayuh program ti diatur ba mengeri tu dudi hari,” ku iya.
Kelimpah sukut budaya, Baru madah, pekara bekaul pengarap patut dijaga meruan laban nya udah nyadi sebagi ari pengidup komuniti Lun Bawang.
“Pengawa sembiang ninting bulan ti diatur komuniti tu siti inisiatif manah dikena negap pengidup spiritual kelimpah mandang komitmen komuniti ngagai pengarap ti ditampung ari aki ini kitai,” ku iya
. Ngelansa pasal sejarah komuniti nya, iya madah, komuniti Lun Bawang kala ngasai transformasyen pengarap ti besai nyengkaum pemansang pengarap ti dikumbai The Murut Miracle tauka The Lun Bawang’s Miracle ba taun 1930-an kelimpah pemansang pengarap khas ti nyadi ba taun 1973 nyentuk 1974.
Nya alai, ku iya, komuniti patut terus mantu rebak biak nyengkaum raban profesional biak ti diau ba mengeri enda ningkilka diri ari urat budaya enggau pengarap sida.
Ba pengerami nya, iya ngelanchar Pengerami Irau Aco Lun Bawang Renggat Ke-39 2026 ti deka diatur kena 2 nyentuk 5 Julai tu lalu KGLT nyadi bakih strategik ngatur pengerami nya.
Nangkan nya, Chairman Pengatur Pengerami Malam Main Asal Lun Bawang Kuching 2026, Zehegkiel Piree madah, pengawa ngatur pengerami nya dikena meri peneleba ngagai komiti ngatur program ti besai agi baka Pengerami Irau Aco Lun Bawang 2026.
Iya madah, bemacham inisiatif udah dipejalai dikena negap budaya Lun Bawang baka ngangkat Bamboo Band nyadi identiti nyelai komuniti, ngemanah ngepan asal kelebih agi ngepan lelaki sereta narak pengerindu rebak biak nguasa jaku asal etnik Lun Bawang nengah Pekit Gituen.
Pia mega, ku iya, komuniti Lun Bawang Kuching merambu numbuh Tim Pancharagam Buluh ti deka merindang ba bemacham pengerami enggau program ba Kuching.
“Aku ngarap komuniti tu ngembuan siti palan khas ba Kuching nyadi palan ngatur aktiviti kelimpah nyadi palan ngenduh ungkup kaban belayan ti datai ari luar Kuching ti begunaka endur diau,” terang iya.
Iya meri terima kasih ngagai KGLT berindik ari penyulut ngatur Pekit Golf Lu Tau Renggat Ke-19 berengkah ari 1 nyentuk 2 Mei tu tadi pengudah 18 renggat sebedau tu diatur ba Miri.
Ungkup rikod, pekit nya ukai semina dikena ngumpul belanja tang nyadi pelasar negap penyerakup komuniti sereta ngelaku pesaka budaya Lun Bawang ngagai mensia mayu
