Idup betatika adat, niti nali sempekat ribat

KITAI bansa Dayak kelebih agi Iban endang idup enggau adat kenyau ari kandung.

Kenu ku PW2 (B) Lenggang Nuing, 48 taun, maya indai ngandung ke kitai, iya endang udah idup betatika adat, niti nali sempekat ti ditampung ngagai peturun Iban kenyau ari kelia.

Betubuh Bisi

Nyadi terubah indu nemu diri deka betubuh bisi tauka ngandung lebuh iya ngasaika diri badu tauka ngetu datai kain.

“Ba bulan siti ti nangkanka nya, enti iya nadai mega datai kain nya baru iya amat nemu diri ribat, udah bisi pemai.

“Indu nya lalu belabuh ngitung bulan diri betubuh bisi ari bulan ti keterubah iya nadai agi tauka ngetu datai kain sereta kandung iya udah lega, indu nya lalu belabuh tauka berasai nyera,” ku iya Lenggang ngelansa.

Sera nyawa

PW2 (B) Lenggang Nuing

Ku Lenggang, lebuh indu nyera, iya deka tetengukka mayuh macham utai dempa kelebih agi baka buah masam enggau mayuh macham utai ti nyelai ke enda kala ka diempa ngelama tu.

“Bisi sekeda nya empegal deka ngempa utai ti enda patut, baka temu tak tetenguka pending laki diri empu, tai manuk enggau mayuh utai bukai.

“Sera tu naka ulih enggau enda tau enda dipantupka lalu sera tu bisi dikenang dalam ensera tauka jerita tuai ti ngenang Keling ti nempuh bemacham penguji.

“Keling mega disebut nyau besabung nyawa deka ngulihka Buah Binjai ti berundai panjai tampuk ti diseraka Kumang lebuh iya ribat.”

Belelang ngiga sera

Nya kebuah ku Lenggang, dulu menya lebuh bini ribat kitai Iban suah belelang nunda pengawa Keling tang pengawa nyau jauh berubah nipakka jeman udah moden diatu.

“Kitai ke lelaki deka bejalai ngiga utai ke diketengukka bini laban bini ribat suah nyera lalu mayuh amat utai diketengguk, macham bansa pemakai deka dipakai.

“Bisi sekeda deka makai jelu jangkat, bisi deka makai buah maram, bisi deka makai batu lemak.

“Penemu sida ke tuai mega madahka enti indu nya tetenggukka jelu jangkit nya ngayuka iya anak lelaki lalu enti tetenggukka buah masam ngayuka anak indu.

“Bisi mega bini ribat tetenggukka utai nyelai ari orang bukai baka batu lemak ngayuka anak deka idup nyelai lebih ari orang ba pengidup, mega ngayuka anak nya deka pintar ngidupka diri,” ku Lenggang nerang silik.

Bepenti maya ribat

Bansa Iban mega balat bepenti kelebih agi bala indu ke benung ribat kelebih agi maya kandung udah manggai tujuh bulan ke alai seduai melaki bini berengkah bepenti.

Kenu ku Lenggang, seduai iya mali ngetas randau atas ai tauka atas jalai enggaika indu kelalu begetah lebuh iya beranak.

“Seduai iya mali nekat ai, mali ngarut, mali nampunka bubu, mali mantangka paku lawang enggaika indu mar beranak.

“Indu mega mali ngelilihka minyak ngagai tapa lalu kena ngeminyak pala enggaika anak tuli,” ku Lenggang nampung.

Kelimpah ari nya ku Lenggang, seduai mali ngentakka ulu duku enggaika anak bengal sereta mali natuk telu manuk enggaika anak buta kelimpah mali nanam pisang enggaika pala anak besai.

Pemali bukai enda tau munuh jelu, burung tauka ular enggaika anak menawa sereta bedarah idung, mali ngikis tachu enggaika anak enda tumbuh buk enggau mali bilik tama orang bisi nupi lelabi enggaika anak ngeram enda ada sereta mali narum enggaika anak ada chelum, ku peranak Mujok, Julau.

Penti maya mindah

Nangkan nya ku Lenggang, enti indu nya bejalai ke bukai, nya jalai iya mansang nya mega jalai iya pulai enggaika anak tesat jalai ada tauka ada tunsang.

“Seduai melaki bini mega mali makai utai dalam kibung nangika beranak mengkang enggau mali ngema batu enggaika anak tungkut sereta mali megai bangkai enggaika anak menawa luput.”

Nitih ku ajar sida ke tuai, udah anak ada tang indai agi begetah, tu dikumbai apai iya mali nyilup tuduh enggau mali nekat ai.

Pengudah anak ada, penti pemali bukai enda mali dikereja seagi ketungkah pemali ti besai agi nyentuk anak mit nyau tau maut kaki diri nya baru penti pemali abis, ku Lenggang madah nyemetak.

Penti ngayuka penempa anak

Sida ke tuai mega suah nyebut enti munuh orang tau ngayuka anak mit nya tau serang.

“Nya kebuah ba ensera Iban, petara sida ke benama Keling nurun ngayau lebuh bini iya Kumang ribat tang diatu nadai ditampung nitihka ubah pemansang dunya.

“Ngenang pasal sida ke lelaki benung bengkak jari, enti enda ulih dikelaung ngereja pengawa, orang bukai asuh dulu udah nya baru tau ditangkan iya.

“Lalu bisi sekeda pechaya enti mantangka paku ba pintu awakka anak lekat enda mati lulus, tang lebuh bini beranak paku nya meseti dibantun nangika anak lekat, enda ada lalu tau ngenusah indu ke beranak,” ku Lenggang nampung kenang diri.

Betangas, bebedong

Orang ribat suah betangas sampai sida udah letu tubuh abis pantang udah beranak.

“Sida milih daun mambung, daun lia enggau tepus lalu beunsut enggau lia ngambika angat tubuh, enda chelap teganggam.

“Sida mega sedia ngaga pedilang di bilik, endur bini bekindu laban orang ke beranak enda tau chelap.

“Kayu ditugung mayuh dulu sebedau bini beranak dikena bekindu nangika hari ujan nadai alai bulih kayu sereta nentuka kayu chukup rangkai.

“Bisi sekeda lelaki malu tekalong dulu nyendiaka bedong indu ke baru udah beranak ke dibelit ngelinggi punggung awakka enda labuh serangan anak.

“Indu nya mega diasuh ngirup ai lia awakka anggat tubuh ngambika enda benta. Lauk orang ke baru udah beranak deka dipilih, laban sida enda tau makai jukut,” ku iya.

Ngintu indu beranak

Lebuh indu beranak, orang ke ngempu pengawa nuntungka tawak ngasuh bala bidan sida serumah datai nekan indu ke beranak lalu bepadah ngagai sida ke benung dalam babas tauka umai.

“Nya dikumbai betekan. Udah anak ada tawak dituntung baru ngayuka anak udah ada sereta ngangauka petara.

“Anak laki suah disambut enggau piring tujuh. Sida ke lelaki enda diasuh meda orang betekan semadi iya nyadi manang tauka beliau muchau ngasuh orang ke beranak nya muntang agi beranak, sereta enda pedis.

“Maya tu mih sida ke bisi ubat mudah beranak beunsutka ubat mudah beranak, meri ubat benta awakka indu ke beranak enda jukat.

“Nangkan nya, kayu idup dipelintang ba jalai pendai enggau kaki tangga madahka rumah agi bepenti ke orang baru udah beranak enda tau ditiki temuai.

“Laban temuai ari rumah bukai deka ditunggu enti niki rumah lalu pemesai tunggu nitihka adat rumah siti siti,” ku iya nambah.

Taja pia ku Lenggang, manuk, besi, pingai sesingkap enggau berau basah meseti bisi.

“Nya dikena bebiau, mudas menua, ngampun ngagai antu,” ku Lenggang nyimpul kenang diri.