BINTULU: Institusyen Pengelandik MARA (IKM) Bintulu nempa sejarah kediri beserimbai enggau Bangkok International Intellectual Property, Invention, Innovation and Technology Exposition (IPITEX) 2020 ti diatur kena 2 ngagai 6 Februari tu tadi.
Ba Pekit Inovasyen Renggat Entarabansa tu sida mujur mai pulai dua midul pirak nengah Pekit IPITEX di Bangkok, Thailand.
IKM Bintulu nempa pemujur nengah topik projek inovasyen iya nya Adjustable Welders Arm Support (AWAS) enggau Pyrolysis: From Plastic Waste To Petroleum Product.
Pemujur tu udah dikeulih nengah projek inovasyen dikumbai Adjustable Welders Arm Support (AWAS) ti disereta tiga pengelicha IKM Bintulu iya nya Mohd Luqman Harun, Husin Mahmad enggau Roslan Saleh sereta empa nembiak ba palan pelajar iya nya Fatin Nisraina Aiyuni Sapian, Mohd Nazrul Zuqira Mohd Fauzee enggau Marcos Iten Meluda.
Projek nya produk teknologi bantu ngambi nyaup bala welder ulih engkah lengan sida ba penuduk ti sama.
Pia mega, penuduk enggau sudut lengan ulih dipindah nitih dikedeka bala penguna ti ngena kereban tu.
Nya kebuah, kereban sukung ba lengan ulih dipindah tu ulih nyaup semua kereja welder sida.
Projek inovasyen dikumbai Pyrolysis: From Plastic Waste To Petroleum Product tu udah disereta siku pengelicha, Safwan Hafizi Masakhoh begulai enggau empat nembiak iya nya Aaron Anjat, Jacksion Simon, Manggie Meluda enggau Sylvestian Saba Sipadinma.
