KUCHING: Orang indu Dayak diansak mansutka diri nyadi ketuai dikena nentuka polisi enggau kuing Sarawak jemah ila majak tegap.

Kaban Kunsil Nengeri (ADUN) Bawang Assan, Datuk Seri Wong Soon Koh madah, indu Dayak nyadi tiang ruang bilik, penumbuh komuniti enggau penyaga budaya ti bejalaika tanggungpengawa besai nempa kuing nengeri jemah ila.

“Orang indu ukai semina patut ngaul diri dalam pemansang, tang mega meseti mansutka diri nyadi ketuai ba proses ngaga pemutus.

“Enti nadai sada nyawa orang indu ti nyadi tuai, polisi ti dipejalai dipeda enda asi lalu pemansang mega enda tembu tauka bisi penimpang,” ku iya.

Soon Koh bejaku munyi nya lebuh bejadika Pengerami Nutup Aum Besai Ninting Taun Ke-34 Sarakup Indu Dayak Sarawak (SIDS) kena Hari Enam tu tadi.

Ku iya, gempuru nya ukai semina pengujung aum aja, tang nyadi pemungkal misyen baru meri kuasa ngagai indu Dayak.

Berindik ari nya, iya ngansak SIDS nempa mayuh agi tuai indu ti bepenau nentuka polisi enggau kuing Sarawak ti meruan.

Iya mega ngarapka mayuh agi indu Dayak deka mansutka diri dalam bidang perintah, dagang enggau institusyen undang-undang.

Ku iya, raban indu Dayak patut meretika pemar ti ditapi komuniti nyengkaum bida pelajar menua pesisir, kurang perengkaguna pengerai, penusah ekonomi enggau pemindah nembiak.

“Orang indu ukai semina patut nyadi penerima polisi aja, tang patut nyadi orang ti bejalaika pengawa numbuhka polisi.

“Nya kebuah, kitai balat ngemeratka pemesai guna autonomi Sarawak ti bisi kaul rat enggau Sempekat Malaysia 1963 (MA63) nyadi pelasar hak nengeri.

“Aku ngandalka hak ti ditegika Sarawak nyadi ubah rakyat enggau orang indu ba rintai mua ngiring, bejaku sereta nempa kuing nengeri tu jemah,” ku iya.