SIBU: Perintah Sarawak chakah ngemansang industri kreatif dikena matak bala pemeranak puku ba nengeri tu.
ADUN Bukit Assek, Chieng Jin Ek madah, nya nyengkaum bala pemeranak puku ba menua tu empu enggau menua luar.
Iya madah, nya kebuah perintah seruran ngemerat pekara bekaul seni enggau main asal dikena nyapai juluk nya.
“Berebak enggau nya, perintah chakah ngatur bemacham program seni enggau main asal kreatif ba nengeri tu dikena nyungkak industri kreatif Sarawak.
“Nya alai, bala pengemeran ngesan pangku pengawa besai ba pengawa ngelaku enggau ngetan bemacham sukut industri kreatif nengah pengawa ngaga enggau mandangka eksibisyen sida, ngatur eksibisyen, program sereta ngambi bagi ba program pelajar bekaul.
“Raban tu nyengkaum bala profesional kreatif, orang seni enggau gerempung main asal,” ku iya.
Chieng mansutka jaku nya rambau bejadi Eksibisyen Gambar Mysterious Hearts of Sarawak – Discovery Kajang Culture ti diatur Gerempung Tukang Gambar Sibu (SPA) ditu, empai lama.
Eksibisyen ti disukung Opis Menteri Dagang Temuai, Industri Kreatif enggau Seni Pemerindang (MTCP) nya berengkah diatur kena 11 nyentuk 17 November tu.
Mensia mayuh diperansang ngulu eksibisyen pechuma nya sebarang maya laban nya diatur ba lobi Hotel Kingwood Sibu.
Iya madah, bala pengemeran industri kreatif diperansang minta belanja ari Turu Mudah Chara Ungkup Pesaka, Seni enggau Main Asal ti disedia MTCP dikena ngelakuka agi main asal pupu bansa ba nengeri tu.
