Industri lada nadai entu mansutka asil

KUCHING: Perintah Sarawak nadai perambu ngasuh ngumpul chukai jualan ba asil lada nyadika penatai pemisi perintah nengeri.

Kebuah pia ku Kepala Menteri Datuk Patinggi Abang Johari Tun Openg, penyampau lada dijual nadai mansutka mayuh asil taja Sarawak nyadi pemansut besai komoditi nya.

“Kitai agi nganti enti bisi insentif ti patut diberi ngagai pekebun lada.

“Pengawa ngumpul chukai jualan lada ukai pengawa ti muntang dikereja laban industri tu agi baru.

“Nya alai kitai agi beratika semua pekara sebedau bejalaika sebarang chukai,” ku Abang Johari.

Iya mansutka jaku nya lebuh dirandau ba Pengerami Gawai Raya ti diatur Sacofa Ba Palan Aum Borneo Kuching(BCCK).

Dulu ari nya, Abang Johari madah perintah nengeri benung ngiga pemansut bukai ti ulih ngumpul chukai jualan ngambi nyadi mansutka penatai pemisi ke baru.

Kelimpah ari minyak enggau gis, Sarawak mega udah ngumpul chukai jualan sawit.

“Pengawa ngumpul chukai jualan tu ukai semina ngagai siti pemansut aja tang ulih dikerembai ngagai asil produk bukai.

“Tang tu nitihka penyampau pemansut lalu aku pechaya kitai ulih bulih asil ari nya.

“Pekara tu udah dirunding aku tang bedau maya aku madah diatu laban aku pechaya kitai bisi tuju enggau juluk nyungkak penatai pemisi menua,” ku Abang Johari.

Abang Johari Tun Openg