Industri muzik Iban lenyau penanyi biak bepenau – Dominic Christy

SIMANGGANG: Malam tadi, industri muzik Dayak teguran enggau enda tepansutka jaku dibai ati kelalu sinu lebuh nerima berita pemidang siku penanyi tebilang Iban benama Dominic Christy.

Dominic tu siku penanyi ke majak pegari nama kelimpah ngembuan patah nyawa ke chukup manah enggau nyelai.

Industri muzik kitai berasai puang ditinggalka siku penanyi ke ngembuan pengelandik enggau penau ba dunya pemerindang kelebih agi bala kaban artis enggau peminat niang.

Niang tu entara siku penanyi lelaki Iban ke majak angkat pegari nama ba industri muzik Dayak di Sarawak tu.

Nama niang majak dikelala enggau lagu Siti Sumpah Siti Janji ti mujur mai iya ngagai renggat kepenudi Anugerah Carta Sapa Juara (ACSJ) 2019 ke diatur RTM ba Eastwood Valley Golf and Country Club di Miri.

Apin lama, Dominic udah ngeluarka single baru di baruh perabung LUH Production iya nya Nyerauh Dalam Ati.

Lagu Nyerauh Dalam Ati disadaka niang tu ditengkebang siku penanyi ke chukup tebilang iya nya Lucy Mapang tauka tampak agi dikangau Lucy M.

Entara lagu disadaka niang Dominic tu iya nya Siti sumpah siti janji, Nyerauh Dalam Ati, Atas Nama Nuan, Pulai Meh Sulu enggau Utai Digaga Petara.

Tudah niang madamka seput malam 6 July, ba Sepital Sri Aman ketegal sakit raya lalu niang disengai ba rumah sida di Taman Gamang ditu empu.

NADAI GANTI.. Bala peminat enggau kaban arti bela berasai puang ditinggalka niang Dominic.