Industri nupi undang galah besai pengulih

KUCHING: Sarawak bepengulih ngemansangka industri nupi undang galah ba menua tu nengah pengawa betanam betupi pintar.

Sapit Kepala Menteri Datuk Amar Douglas Uggah madah, inisiatif tu nipakka atur pemakai sereta kualiti AI ngena chara loT ti dipejalai serikat menua, Sea Horse Corporation Sdn Bhd.

“Serikat tu nyendiaka pemakai ari genetik anak ikan Hawaii ti diasilka baka alga.

“Pemakai tu deka ngasuh undang galah jampat besai manggai 150 gram kandang lapan bulan.

“Stok alga tu udah dikerembai nengah projek kerejasama entara Palan Biodiversiti Sarawak, Mitsubishi Corporation enggau Chitose Group,” terang iya.

Uggah mansutka jaku nya pengudah ngabas kilang nginjin alga disempulang bala bukai ba Bintawa, ditu apin lama ke udah.

Ku Uggah, serikat Sea Horse mujur eksport asil undang manggai RM61 juta taun nyin kemari ngagai menua luar baka Australia, China, Jepun, New Zealand, Emiriah Arab Bersatu, Qatar enggau Singapore.

Terang iya, pengawa tu deka terus disukung piak perintah berindik ari semengat enggau pengeransing bala pedagang ngerembaika agi industri tu.

Ba lansa bukai, serikat Sea Horse udah nyain Sempekat Pemereti Ati (MoU) enggau opis Menteri iya nyadi sebuah serikat besai ti ngeluarka asil tasik taun nyin kemari.

Suara Sarawak