KUCHING: Perintah bisi bejalaika sekeda inisiatif enggau insentif dikena meransang mayuh agi nembiak menua tu ngaul diri ba industri agrikomoditi.
Sapit Menteri Besai ti mega Menteri Pengawa Bekebun enggau Komoditi, Datuk Seri Fadillah Yusof madah, nya mungkur program narak penyedar, latih enggau insentif ngagai raban nembiak.
“Perintah mega meri fokus ngagai latih ba pengawa ngerembaika kaul raban nembiak ba pekara tu.
“Opis Menteri Pengawa Bekebun enggau Komoditi udah numbuhka Institut Pengawa Bekebun enggau Komoditi Malaysia (IMPAC), sebuah palan ti nyendiaka latih ngagai nembiak ti bisi minat ngaul diri ba sektor betanam betupi,” ku iya.
Fadillah bejaku munyi nya lebuh ditanya pemberita pengudah bejadika Randau Guna Kuasa Agrikomoditi ditu, kemari.
Ku iya, nengah program latih tu, raban nembiak deka dilatih ngintu kebun, ngena pengelebih kereban teknologi pemadu baru enggau penau bukai ti diguna awak meri empas ba industri pengawa bekebun.
Kelimpah ari nya, iya madah, perintah mega bejalaika inisiatif dikena meransang sida masuk industri nya.
Taja nadai nerang silik sentang inisiatif nya, iya madahka perintah deka terus berundingka chara mantu serikat mit enggau orang dagang pengawa bekebun ti enda besai.
“Sida ti begunaka bantu tau nganjung peminta ngagai perintah, kitai deka ngiga jalai meri sukung insentif ti patut enggau engkeman,” ku iya.
Sama bisi datai Sapit Menteri Industri Pemakai, Komoditi enggau Pemansang Wilayah Sarawak, Martin Ben.






