ARTIKEL

DISUKUNG… Ke tanda sukung, bala Gerempung Indu begambar seraya megai bup ba sukut librari Rumah Trisy.

Inisiatif peranak Rumah Trisy numbuhka librari rumah panjai dipuji

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PENGAWA numbuhka Librari Rumah Trisy, Nanga Slaut Tengah, Julau endang ari buah penemu peranak rumah panjai kelebih agi Pengajar Dolly ti enda sanggu ngena belanja diri empu meli koleksyen bup.

Ku Tuai Rumah Trisy, sida serumah udah selubang penemu numbuhka librari rumah panjai tu belabuh ari taun 2021 lalu udah dipenyadi 2 Mei 2021.

“Puji Tuhan, pengawa ti udah diperambu kami sebuat nyadi nyata ba taun 2021.

“Semua tu berekat sukung enggau saup ari Pengajar Dolly ti enda sanggu enggau rangka ngena belanja diri empu meli bemacham bup dikena mungkal pengawa ke deka diatur kami.

“Tambah mega, sukung kami serumah kelebih agi bala nembiak endang meransang lalu ngasuh kami ransing numbuhka sukut librari ti udah dipindah ba ruai aku.

“Arapka pengawa kami tu majak disukung lalu nyadi chunto rumah panjai bukai.

“Tuju kami numbuhka endang deka marit bala nembiak ngembuan pengangkun enggau pengerindu macha.

“Pengerindu macha tu ulih nempa bala nembiak nyadi modal mensia ti menyana laban ngembuan mayuh penemu.

“Berambaika jaku Sebetis Sama Sekaki, Setapa Sama Sejari, Serunding Sama Seati, kami Komiti Pemansang enggau Pengelikun Genturung Pendiau (JKKK) Rumah Trisy naka ulih berunding enggau ngemujur bemacham inisiatif ti tau pulaika pemanah ngagai diri serumah kelebih agi bala nembiak,” terang iya.

SUKUT LIBRARI

Ngenang silik, Tuai Rumah Trisy madah, tuju bukai numbuhka sukut librari tu ngambi nyendiaka fasiliti ngagai peranak rumah panjai kelimpah meransang bala ba rumah panjai sekali ke orang biak tauka orang besai tuai ngemeran pengawa rindu macha bup maya lepa.

“Kitai ba rumah panjai, maya nadai pengawa tau ngena awak enggau peluang macha bup.

“Tu meh tuju kami numbuhka sukut librari ngambi awak ba rumah panjai enda tebasau ngapa kelebih agi maya peremisi sekula.

“Maya peremisi sekula, bala nembiak ulih macha bup bebala mayuh ba ruai ditu dikena nambahka anak penemu.

“Pengerindu macha tu tau nempa nembiak ti bepenemu enggau ngembuan mayuh seling penemu dikena ngangkatka diri enggau pengidup sida,” ku pesan Tuai Rumah Trisy.

Ngenang pasal sukut librari nya, iya madahka bup nya pemeri peranak rumah panjai kelimpah koleksyen bup ti dibeli Pengajar Dolly.

Puji Tuhan ku Tuai Rumah Trisy, bisi bala kelebih agi ari Librari Pelilih Julau nemu begigaka iya lalu madahka diri deka meri bup.

GERAH JARI

Naka diatu, bisi 475 bup ba sukut librari nya baka bup novel, bup cherita, diksionari, majalah enggau ke bukai.

Ngenang perambu sida serumah, iya madah, udah tu sida deka nambahka koleksyen bup kelebih agi bup akademik lalu agi ngiga kaul tauka orang ti gerah hari meri bup ngagai sida serumah.

“Barang sapa ti bisi ati meri bup dikena nambahka sukut librari, kami semampai nerima enggau penuh pengaga kelai sukut librari kami tu disukung mensia mayuh.

“Timbal ari mensia mayuh ba ruai Facebook Pages JKKK Nanga Slaut Tengah, Julau chukup manah, muji sereta nyukung pengawa kami tu.

“Bisi nya deka bechuntoka sukut librari kami tu, endang patut dipujur dikena marit bala nembiak rindu macha.

“Enda ibuh sebut mih peranak Rumah Trisy empu, semampai nyukung sebarang pengawa dipejalai dikena ngemansangka rumah panjai.

“Nya alai, barang sapa ti bisi ati deka meri bup ngambi nambahka sukut librari kami, anang malu madah ba ruai Facebook Pages kami nya au,” ku Tuai Rumah Trisy.

Nya alai, barang sapa ke deka nemu aktiviti tauka pengawa dikereja peranak Rumah Trisy, kita tau ngelawa Facebook Pages JKKK Nanga Slaut Tengah, Julau.

NAMBAH PENEMU… Sukut Librari Rumah Trisy Nanga Slaut Tengah, Julau.
FASILITI… Ba ruai Tuai Rumah Trisy mega bisi disediaka bangku enggau mija endur macha bup ba sukut librari nya.

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU