Pua Kumbu siti ari kain asal kitai Iban ti chukup berega laban chara ngaga pua tu bebida ari chara ngaga kain bukai.
Pua Kumbu ngembuan mayuh chura sereta bungai lalu enda tau ditenun sengapa laban ku orang tuai kelia pua Kumbu tu bisi reti kediri empu.
Lebuh dunya majak moden, chura pua kumbu mayuh udah dichelak ba kain linen, kain batik enggau kain bukai.
Inovasyen tu lalu ngujungka orang indu kemaya hari ti landik dalam pengawa bejait nguji nyait kain ngena motif bungai pua kumbu nyadi baju nembiak mit, gaun, skirt, baju kemeja, tanchang buk, sengkabung mua enggau ke bukai.
Taja pan, kain pua kumbu nya diubah tauka nadai ditenun, tang penulin bungai pua kumbu baka bungai terung, kukut remaung, bungai tungku, gelung paku enggau ke bukai agi meruan ditan.
NAMBAH PENATAI PEMISI
Pekara tu udah balat narit ati Manda Rengga, 29, ti nyait bemacham bansa baju ngena motif pua kumbu ngujungka iya kala dipinta ngaga gaun pua kumbu dikena orang melah pinang.
Manda asal ari Miri, madahka pengelebih belajar Diploma Pelajar Dagang sereta pengelandik bejait udah muka ruang ngagai iya nambahka penatai pemisi sida sebilik.
“Aku belubah nitihka singkang orang nyait baju, sengkabung mua enggau tanchang buk ari kain motif Pua Kumbu.
“Penyelai bungai pua kumbu balat narit ati mensia mayuh laban lebuh nyanggul buk, chura sereta bungai pua kumbu nya terus ayan ba pala kitai indu,” ku iya ngepunka randau enggau Suara Sarawak.
Ku iya, semua produk tu digaga iya empu kediri lalu ngelakuka produk nya ngena chara online.
“Aku ngena tiga laman online dikena nyual produk kraf tu iya nya facebook aku empu, facebook page enggau instragram.
“Enti sebedau Covid-19, aku kala muka kedai ba pasar besai (booth) lalu ngayanka semua produk digaga aku nya dia.
DIJUAL CHARA ONLINE
“Tang pengudah Covid-19 ngerekai, aku ngalih ngagai pengawa dagang online laban nya dagang ti pemadu laku jeman diatu,” ku iya.
Manda nusi, rega baju dijual iya berengkah ari rega RM25 nyentuk RM150 bepanggai ngagai gaya ti dikedeka pemeli.
“Ungkup nembiak mit, rega baju urung RM25 nyentuk RM75 bepanggai ngagai chura enggau bansa kain. Ungkup orang besai dalam RM55 nyentuk RM150.
“Bisi mega aku ngaga gaun Pua Kumbu dikena orang melah pinang tang rega gaun nya mar mimit laban chara ngaga enggau bansa kain bebida,” ku iya.
Kelimpah ari nya, ku Manda, pengudah bedagang nengah online iya napi pemar nentuka saiz bala pemeli.
“Kekadang, sida ti ngudar baju nadai nemu nyukat pemesai tubuh diri, enti suba sida empu ngusung aku kitu, tang empas Covid-19 sida nyukat tubuh diri empu ba rumah.
“Tu siti pemar ngagai aku laban nangika pemesai ti disukat sida gerah tauka sendat laban nyema udah nyadi baju nya mar deka diubah agi.
“Kena mutarka penanggul tu, aku ngaga video ngajar sida baka ni nyukat pemesai enggau ngatur bansi nyema sida deka besai mimit tauka mit mimit,” ku iya.
SAIZ NYUKAT KEDIRI
Ku iya, video nya ti dianjung iya ngagai pemeli awakka sida enda salah tauka nemu baka ni nyukat baju ti deka digaga.
Indai ngagai siku anak tu madahka, orang suah ngudar baju motif pua kumbu ari iya lebuh bisi pengerami baka pengerami melah pinang, betunang, Hari Gawai enggau ke bukai.
“Pengelebih servis aku, aku bisi nyendiaka kain ngagai bala pemeli ti deka ngudar baju laban kekadang sida enda nemu dini meli kain ti bisi chura baka tu.
“Aku mega deka meri lalau ngagai sida ni bagi chura ti manah kelebih agi baju gaun melah pinang,” ku iya.
Iya ngarapka dagang ti digaga tu terus nerima peminta sereta sukung ari mensia mayuh.
“Produk tu manah laban bisi kelai Borneo lalu bedau entu dikelala orang ba luar.
“Aku ngarapka produk tu ulih rembus ngagai menua luar kelimpah sama ulih mantu orang indu ti gawa ari rumah nengah chara bedagang online,” ku iya.
Mensia mayuh ti deka ngudar tauka meda asil keranjai jari Manda tau ngelawa Facebook iya empu Manda Rengga, ngelawa ruai Facebook Page iya Manda Homemade Tailor tauka instagram iya @borneostrreetwear.
