KUCHING: Kepala Menteri Datuk Patinggi Abang Johari Tun Openg deka madahka berita pemadu baru pasal perambu Perintah Sarawak nambahka peneras arus penyambung ba menua pesisir dalam bulan Februari tu.
Ku iya, perambu nya formula enggau chara baru ari Perintah Sarawak dikena nyungkak ekonomi digital.
“Tu mih utai dikerunding kitai lalu semua nya ulih dipejalai lebuh ngembuan perintah ti tegap sereta ngemeratka Sarawak enggau rayat iya,” ku Abang Johari.
Abang Johari mansutka jaku nya ba aum pemberita pengudah bejadika Pengawa Nasih Tanah Projek Rayat Balai Lumba Komuniti enggau Hub Inovatif ba taba kuari Ang Cheng Ho, ditu ensanus.
Taja pia, iya enggai madah silik pasal perambu nya.
“Tu bekaul arus penyambung ba menua pesisir tang anti dulu nyentuk bulan Februari endur aku madahka pekara nya,” ku iya nerang.
Ba lansa sama, Abang Johari ngelalau rayat menua tu anang enda berundingka pemansang Sarawak dudi hari.
“Sarawak tu sempama baka dara bajik, enti bajik udah tentu mayuh orang tekait ati.
“Baka nya mih kitai nyentuk orang bukai deka megai menua tu.
“Ketuai ti megai menua tu deka betukar belama, aku mega deka pinchin lebuh udah datai timpuh iya.
“Tang pekara pemadu beguna diatu nya kitai ngembuan ketuai ti udah dilatih nentuka menua kitai mengkang tegap.
“Nya kebuah, genap ketuai bisi guna enggau tanggung pengawa ngemansangka menua tu manggai taun 2030,” terang iya.
Nambahka nya ku iya, kena Hari Satu tu tadi, sebuah serikat aplikasyen digital ari Sarawak udah menang anugerah ba renggat nasional dikena numbuhka aplikasyen digital baru sereta nerima RM250,000 ari Perintah Sarawak.
“Sida menggi gelar champion lalu teknologi baru sida ulih ngempung semua penerang (data) pasal jalai alun, pengawa nyelei enggau ke bukai sereta sida semina masang kamera ba skrin entukar ngambi diperati Opis Kereja Raya (JKR).
“Pekara tu mega deka ngemuntangka pengawa kelimpah nambahka penau kami nyeleti jalai.
“Aplikasyen tu datai ari Sarawak, reti iya rayat Sarawak mayuh pintar lalu kitai bisi pengelebih besai,” ku Abang Johari nerang.