PENGAWA ngaga produk kraf jari tu suah dikereja dikena ngisi awak lepa lalu bisi mega nyadi pun penatai pemisi.
Taja pia, bisi sekeda orang ngadu kraf jari tu semina rindu aja ungkup pengawa pengasih ke mega pengawa tuchi ti patut ditunda bala bukai.
Ukai semina dikena ngemantupka ati, tang orang ti ngembuan ulah tuchi tu andal ulih meri pemaik ngagai mensia mayuh nengah chara meri bantu asil bejual kraf jari sida.
Siku indai tuai ti udah pinchin, Isabel Lee, 63, madahka diri gaga ngaga kraf jari ari keretas maya lepa.
Kelimpah ari nya, iya meri bantu ngagai gerempung ukai dikuasa perintah (NGO) rambau bisi pengawa bejual pengasih.
PENGAWA MANAH
Sepemanjai Festival Pemakai enggau Bejual Pengasih Gerempung Autisme Kuching (KAA) ba Gerempung Gerija di Sarawak diatur, Lee ngayanka asil kraf jari iya ti nyelai enggau manah.
Iya mega bejual sereta nyukung pengawa KAA ngumpul belanja ungkup ungkus operasyan gerempung nya.
“Tu taun ketujuh aku ngulu festival bejual pengasih, lalu aku gaga laban ulih mantu gerempung nengah chara aku empu,” ku iya lebuh dirandau Suara Sarawak, kemari.
Indai ngagai dua iku anak tu madah, 100 peratus asil ari bejual kraf jari nya diberi ngagai KAA.
“Sebedau tu, aku udah dikangau sida KAA meri latih ngagai anak autisme pasal teknik enggau chara ngaga kraf jari ngena keretas pengelama setaun,” ku iya.
RUNDING KREATIF
Pengudah pinchin ari pengawa nyadi siku pemantu ba kedai farmasi, Lee neruska minat iya ngaga kraf jari ari keretas nyentuk diatu.
“Aku nadai ati ngaga asil seni tu dijual tauka nyadi dagang endur ngulihka untung, tang semina rindu ngereja pengawa tu dikena ngisi awak lepa.
Tebal agi, buah runding ngaga nya datai ari Pinterest enggau YouTube.
“Aplikasyen tu chukup manah laban ulih nambahka kreativiti lalu YouTube nya pen muntang kitai belajar laban ulih nunjuk chara ari pun nyentuk udah tembu.
“Aku mega ngiga anak penemu nengah pelasar bukai seraya berunding chara kreatif bukai ngambi asil keranjai jari tu manding dipeda,” terang iya.
Lee madah, sekeda kraf ti digaga iya baka penanda bup, anak patung Jipun, bungai enggau ke bukai.
