KUCHING: Tuai Nembiak Bersatu (Armada) Sarawak, Alexander Frusis ngarika raban Armada Sarawak ngutuk ulah enggau penemu siku tuai raban bansa ke chukup enda beradat bekaul enggau ‘isu magi baja’ dipansutka ba media rama sereta balat nerima pejah ari mensia mayuh.
“Selemai-lemai tu (kemari) tadi aku nerima mayuh amat ripot tentang jaku ari siku tuai raban bansa ti benung dikerembai ba sebelah aplikasyen Whatsapp.
“Jaku pesan audio nya mantaika jaku siku tuai raban bansa nganu bala penyukung penyakal ba pengawa bepilih nengeri tu tadi madahka penyakal enda patut nerima baja sawit ke diberi perintah GPS.
“Dalam jaku nya mega, iya minta bala tuai rumah ngerintaika nama serta lumur kad pengelala orang ke nyukung penyakal awakka sida tu enda nerima bantu baja,” ku Alexander madah ngagai Suara Sarawak.
Nya alai, ku Alexander Armada Sarawak madah nya mih ngelai penemu tuai raban bansa ke baka nya bedau mansau runding ba politik.
“Ba atur demokrasi rayat nadai tau ditagang, ditekan milih sapa tuai dikedeka sida. Menua kitai Malaysia ngemeranka atur demokrasi, nyadi ulah ke baka nya patut diketu.
“Kami raban Armada Sarawak mejah tauka nadai nyukung penemu ke tuai ke baka nya lalu minta raban bekaul mansik pekara tu enggau silik.
“Ulah (politik nekan) ke baka nya enda tau dikemeran sapa-sapa sekalika Tuai Rumah, Penghulu, Kaunselor, Pemancha, Pengari Rayat (ke baru dipilih) laban semua pemansang ke datai ari perintah endang patut diterima diasaika semua rayat enda ngira ari ni ideologi politik sida,” ku Alexander.
Naka berita tu ditulis, siti ripot polis udah digaga siku Menijar ba Serikat Minyak enggau Gas, Reggie Suel di Balai Polis Besai Bintulu kemari, bekaul enggau ulah tuai rumah ari Samalaju ti nekan rayat enda ngasuh orang ke udah nyukung penyakal diberi bantu baja.
