Isu Sekula: Umbas bekelikuh, keamatka semaya

KUCHING: Perintah Besai enda patut bekelikuhka cherita lama tang patut ngamatka semaya deka nembuka pengawa nyeleti sekula repuk di Sarawak.

Menteri ba Opis Kepala Menteri (Intergriti enggau Ombudsman) Datuk Talip Zulpilip pekara bekaul enggau sekula repuk tu siti pekara ti udah lama nyadi ba nengeri tu.

“Suba endang bisi kunterik dikena nyeleti sekula repuk, tang pejalai projek nya enda tentu mujur.

“Perintah Besai patut ngamatka semaya sida nyeleti sekula repuk tu laban nya endang ba baruh kuasa sida,” ku iya.

Talip madah munyi nya lebuh dirandau Suara Sarawak pengudah Program Randau begulai enggau Menteri (Intergriti enggau Ombudsman) Ketuai Opis enggau CeIo, Opis Kepala Menteri ba sebuah hotel ditu, kemari.

Nangkan nya ku iya, berengkah ari pegai perintah ke dulu suba (Barisan Nasional), pekara tu endang udah bisi enggau agih belanja penyampau RM500 juta.

RANDAU.. Adana Jed (kiba) enggau Zulhairi Zaidel (kanan) maya ngulu Randau Begulai Enggau Menteri ba Opis Kepala Menteri, Datuk Talib Zulpilip (tengah), ditu kemari. Gambar- NURUL FADZLYN ZAMURY.

“Taja pia, projek nya enda mujur tembu laban bisi kes makai suap nyadi entara kunteriktor projek enggau menteri lebuh nya suba,” ku iya.

Nya alai ku iya, pengudah Perintah Nengeri ngambi chara ti pintar ngambi projek nyeleti sekula repuk nya, diatu projek nya udah nunjukka ubah mimit.

Talip ngarapka Perintah Besai enda ngaitka politik enggau pengawa nyeleti sekula repuk tang beratika pengelantang enggau pengelikun pengajar sereta nembiak ti ngena sekula nya.

Ba lansa ti sama, Program Randau begulai enggau Menteri (Intergriti enggau Ombudsman) Ketuai Opis enggau CeIo, Opis Kepala Menteri siti program dipejalai Unit Intergriti enggau Ombudsman Nengeri (Union).

Tu siti ari inisiatif ari Perintah Sarawak ngambika rayat nengeri tu kelebih agi sida pengereja pengawa perintah seruran jauh ari penyalah makai suap seriris enggau juluk Perintah Sarawak deka nyadi nengeri intergriti mansang ba taun 2030.

Sama ngulu program nya Direktor Union Adana Jed, Ketuai Pemesai Intergriti Union, Zulhairy Zaidel enggau pengari ketuai opis ke bukai.

Suara Sarawak