PENANYI Dayak bepenau, Jacob Ressa, 32, empai lama mujur ngeluarka lagu pemadu baru diri ti pejuluk Jauh Nuan kena 5 Februari tu tadi.

Urung sebulan lagu berentak reggaeton remix Mexican nya dikeluarka nengah pelasar YouTube Jacob Ressa Channel mujur dipeda ba penyuah lebih 1,500 kali.

Nemu kita? Kisah dalam lagu nya bisi nyangkut pengidup penanyi sigat ti datai ari Kampung Arus Iban, Sebangan, Simunjan.

PENGERINDU ENTARA MENUA

Terang iya, lagu nya ngenang pengasai ati dua iku sulu ti jauh pangan diri ketegal diseraraka dua menua lalu semina ulih betemu maya kemisi aja.

“Besulu jauh entara menua ukai pekara ti nyamai laban nya ngaul pengasai ati, pengerindu, pengelengau enggau nyaga ati diri empu.

“Tu meh penguji besai enti jauh ari pangan diri, enda ibuh sebut pengelengau ati semampai keran deka betemu.

“Amat meh ulih ngaga kangau video, betelefon, bekirum pesan tauka meda gambar sulu ati nengah telefon binching tang nya enda asai ti betemu betunga mua.

“Pengelengau enggau pengeran ati deka betemu enda alah sebut agi, sema jaku nyau ninting sikin lelengau merampau belama.

“Anak ati sigi kekisi belama enggai jauh pangan diri tang nama daya kitai tu anak mensia bekuli ngiga belanja ba menua orang.

“Sigi dianti meh enti bisi kemisi dikena betemu enggau pangan diri mantupka pengelengau enggau nanggam pengerindu.

“Aku chukup mereti amat pengasai ati sida ti jauh ambai asi tampun puji laban aku empu pen kala ngasai peneleba sebaka,” ku tusui Jacob Ressa.

Nya kebuah lebuh iya diberi basa nyadaka lagu nya, iya ulih nyadaka lagu nya ari ati pemadu dalam laban kisah dalam lagu nya bisi nyangkut pengidup iya.

“Taja pen dua iku sulu nya jauh ari pangan diri tang seduai bela nyaga enggau ngintu ati diri empu ngambi enda jampat bebali ngiga orang bukai ke ganti.

“Nya meh ti dikumbai orang kemaya hari tu kuasa pengerindu,” ku tampung iya seraya tuchum lelinsum.

Ku lalau Jacob Ressa, taja pen kitai besulu jauh menua tauka diserara tasik besai, ukai reti kitai tau ngayahka pangan diri sepeneka ati.

Iya madah, jaga manah meh ati diri empu ngambi enda mudah limpang ke bukai sereta besampi meh ngambi kaul tuchi nya ulih ditanggam ngena tinchin semaya idup melaki bini nyentuk nyawa lesi nengali hari, parai nengali lemai.

“Nya alai, aku ngarapka sida ti benung besulu jauh entara menua semampai liat, teguh enggau entap ati nempuh semua penguji,” ku iya.

MINAT ARI MIT

Minat enggau pengerindu Jacob Ressa ba pengawa belagu nya endang dikembuan iya ari mit rambau agi besekula ba Palan Nyeridi Anak Mit (TADIKA).

Seraya mulaika kenang, maya nya suba iya mujur dipilih pengajar nyadi pengari TADIKA sida nyadaka lagu TADIKA enggau lagu nasional.

Berengkah ari nya meh iya suah masuk bemacham pekit belagu ti diatur raban sekula nyengkaum mandangka tanda asal.

Ukai semina ba renggat sekula primari enggau sekondari, lebuh nampung pelajar ngagai palan pelajar tinggi enggau tembu belajar iya pen chakah bejalaika minat diri ba pengawa belagu enggau mandangka tanda asal.

Nya nyengkaum Pekit Belagu Parish Sale St Francis, Kota Samarahan (champion), Pekit Belagu KFC Wisma Saberkas (finalis), Pekit Belagu Fun Fair Matang (penuduk kedua), Pekit Belagu Taman Samarax, Kota Samarahan (penuduk ketiga) enggau Pekit Belagu Mantar Gawai SDNU (10 pemadu atas).

Kelimpah ngambi bagi ba pengawa pemerindang teater P. Ramlee, Jacob Ressa masuk program nguji penau realiti televisyen (TV) baka Akademi Fantasia Musim Ke-7, Mentor Ke-4, Mentor Millenia enggau My Starz LG.

Iya mega kala masuk bemacham pekit belagu ti diatur serikat pengeluar lagu lokal baka Oliver Christy Henry Sound Production (OCHSP) enggau Irama Music Production.

“Sebedau tepejuh ba dunya pemerindang Dayak, pekit belagu kepenudi dipasuk aku iya nya Pekit Belagu Mantar Gawai 2015 ti diatur Serakup Dayak Nasional Sarawak (SDNU).

“Pengelandik belagu enggau pemanah sada nyawa iya mujur narit ati raban Irama Music Production.

“Ari nya meh aku lalu ditanya sereta diberi peluang ngerikod enggau ngeluarka lagu ba baruh perabung sida nengah album 4 Sada Nyawa.

“Taun 2015 nya meh singkang keterubah aku ngaul enggau tepejuh ba dunya pemerindang nyentuk sehari tu,” ku padah anak pengkuan ari empat iku diri menyadi nya.

Naka diatu, Jacob Ressa udah ngeluarka mayuh lagu diri empu lalu dua ari lagu nya nengah album 4 Sada Nyawa baka Disangkai Pengerindu Nuan enggau Kemarau Di Ati.

Iya bela ngeluarka lagu single diri ti pejuluk Pait Rachun Pengerindu, Dara Sebangan lalu pemadu baru iya nya Jauh Nuan kelimpah lagu Gawai baka Gawai Lelingai.

Nangkan nya, iya bela ngeluarka lagu bepadu nyawa enggau Krisberne Fowler nengah lagu Betesau Gawai sereta Chris Aidan enggau Krisberne Fowler nengah lagu Pelandai Cherita Tua.

BEDARAH SENI

Labang apai, labang anak. Nya siti sempama ti engkeman dikena nerang minat enggau pengerindu Jacob Ressa ba pengawa belagu.

Nya alai, anang tekenyit kita enti Bujang Simunjan nya landik belagu enggau ngembuan patah nyawa ti manah didinga.

Kebuah pia laban apai iya, Bayoi Gena siku orang ti landik belagu enggau nebah kereban muzik baka keyboard, gita enggau dram.

Nangkan nya, apai iya siku ari kaban The Sweater Band sereta kala ngerikod enggau ngeluarka lagu ba Radio Televisyen Malaysia (RTM) ti pejuluk Midnight.

Jacob Ressa enggau tiga iku menyadi iya pen bela nunda singkang apai sida ba pengawa nya ukai semina landik belagu tang pintar nebah kereban muzik.

Ambi ke chunto, menyadi tuai iya landik nebah dram lalu menyadi iya ti lumur dua pintar nebah gita.

ANDAU PENGUJI

Dikena nyapai juluk ati diri, udah tentu kitai deka napi mayuh macham penguji ti ngeruga ngempang ba rantau jalai ti ditujah kitai.

Baka nya mega, juluk Jacob Ressa ba pengawa belagu sereta mekuh dunya pemerindang Dayak tu bela dibantah apai enggau indai ti dikesayau iya.

Amat meh sida sebilik ngemeranka pengawa belagu tang apai enggau indai enda nyagi iya bekempit ba pengawa nya laban iya agi besekula.

“Aku enda nyalah seduai laban aku nemu tuju seduai ngaga baka nya. Pelajar tu pekara ti beguna lalu udah tentu apai indai deka bala anak ngemeratka pelajar sida.

“Kebendar, seduai enda nagang aku mekuh dunya pemerindang tang seduai dekaka aku meri perati ngagai pelajar dulu, udah nya baru nyapai juluk diri ba pengawa belagu.

“Seduai irau enti aku ngaul dunya pemerindang, udah tentu aku deka kiruh dikangau merindang kin kitu lalu ba maya sebaka nadai awak ungkup pekara pelajar.

“Taja pia, ketegal pengerindu besai enggau darah seni nyerangkap ba tubuh aku ngujungka aku neruska minat diri nyentuk sehari tu,” terang iya.

Nangkan nya, lagu iya bedau ulih diterima pending mensia mayuh kelebih agi bala peminat lagu Dayak lalu timbal ari sida bedau ngemantupka ati.

Jacob Ressa rindu agi milih rentak lagu nitihka trend kemaya hari baka reggaeton remix enggau nunda rentak lagu menua luar.

Engka nya lagu iya bedau tentu ulih diterima manah ari semua peminat lagu Dayak lalu iya ngarapka lagu diri majak dikerindu semua orang enda ngira serap umur.

“Tuju aku ngaga baka nya laban deka nempa penyelai sereta nyungkak kreativiti enggau inovasyen nengah lagu nitihka ubah jeman.

“Ngambika rentak lagu kitai Iban mayuh pilih, bemacham tiun, kreatif enggau inovatif dikena nyaguka industri muzik Dayak ngambi bediri sama tinggi, duduk sama baruh enggau industri muzik menua bukai.

“Nya alai, aku ngarapka lagu aku diterima manah semua orang kelebih agi raban nembiak,” ku iya.

Pia mega, pangku pengawa iya nyadi Operation Technician ba industri minyak enggau gas ngujungka iya nadai awak bejalaika pengawa merindang bala peminat.

Nya alai, iya semina bejalaika pengawa merindang maya kemisi aja pengudah mulaika diri ke Sarawak.

TERUS NYAPAI PENYULUT

Lebuh dirandau senentang tunga kuing diri jemah, Jacob Ressa andalka diri empu ulih terus nyapai penyulut ba pengawa merindang.

Iya ngarapka diri empu ulih ngindikka kaki ba panggau besai Anugerah Charta Sapa Juara (ACSJ) baka bala artis Dayak ti bukai.

Pia mega, iya madahka diri merambu ngeluarka mayuh agi lagu bekualiti enggau nyelai sereta ngarapka lagu nya ulih diterima mensia mayuh.

“Pengawa belagu tu endang minat aku lalu udah nyadi sebagi ari pengidup aku. Aku udah ngemeranka pengawa tu ari mit nyentuk diatu.

“Nya alai, aku enggai ngetu naka tu aja lalu deka terus ngemansangka diri ba pengawa tu nunda singkang bala artis bukai ti tengkar.

“Siti juluk ati aku iya nya deka ngindikka kaki ba panggau besai ACSJ kelimpah ulih nyadi chunto ngagai rebak biak ti deka mekuh pengawa tu.

“Aku rinduka penyelai enggau bebida ari orang bukai. Nya alai, aku ngena tiun reggaeton remix ba lagu Jauh Nuan.

“Diatu kitai udah bisi ACSJ dikena ngaku bala penengkebang leka lagu enggau bala artis kitai Dayak ngambi sida ransing agi ngeranchakka industri muzik kitai,” ku Jacob Ressa ti rindu ninga lagu enggau meda movie.

Kemaya hari tu, ku iya, industri muzik Dayak jauh bebida ari 10 taun ti udah sereta majak mansang ke mua nyapai penyulut besai.

Iya madah, pekara nya ulih dipeda nengah pemanah kualiti, kreativiti enggau inovasyen tiun lagu, video muzik, jalai cherita dalam lagu enggau ti bukai.

Lebih ngemegah, ku iya, lagu kitai Dayak ukai semina dikerinduka semua orang ba selampur Sarawak aja tang bansa enggau menua bukai.

Ungkup penerang, Jacob Ressa bisi bejalaika dagang mit nyiur parut enggau ai santan begulai enggau menyadi iya ba sitak Kota Samarahan.

BANTAI PENAU DIRI

Jacob Ressa ngelalau rebak biak ti bisi penau belagu sereta deka nguji tama dunya pemerindang ngambi berani muka singkang diri.

Iya madah, anang malu mantaika penau diri tang kemansangka penau nya dikena kitai ngerichah enggau ngangkatka agi industri muzik Dayak.

“Keterubah, kitai patut netapka tuju kitai ti amat lebuh tama dunya pemerindang tu iya nya deka merindang lalu ukai semina deka tebilang aja.

“Pia mega, kitai meseti ngasilka lagu ti bekualiti, nyelai, semak ba ati peminat enggau bebida ari orang bukai ngambi ulih besemekih ba industri tu.

“Tama dunya pemerindang tu ukai pekara ti mudah laban mayuh penguji nganti kitai ba mua, nya alai, liatka ati kitai napi semua penguji nya.

Pemadu beguna, anang sesekali jampat mantul.

“Udah nya, anang begedika pemujur bala artis bukai engka nya udah jereki sida tang belajar lalu ambi sida nyadika chunto dikena mansang ke mua.

“Pengelandik enggau jereki genap iku kitai enda sebaka.

Engka diatu kitai enda tentu dipalik orang tang ingat meh pengidup tu baka ruda, taun tu jereki orang tang taun dudi sapa nemu,” ku lalau iya.

Sebedau ngujungka randau diri, Jacob Ressa meri besai terima kasih ngagai semua orang ti nyukung pejalai iya ba dunya pemerindang kelebih agi bala peminat, sida sebilik, bakih, bakih sama industri enggau kaban belayan.

Iya madahka diri betuah laban sida enda leju nyukung enggau besampika pejalai iya ba dunya pemerindang.

Nya alai, iya ngarapka sida terus nyukung iya enggau bala penanyi Dayak ti bukai ngambi industri muzik Dayak majak pegari.