KUCHING: Pesan Temenggong Jugah ‘Anang Malaysia baka tebu, manis di pun tabar di hujung’ meseti meruan dikeingat Perintah Penyerakup.
Nyebut pesan niang aki iya ke mega orang ti numbuhka Malaysia, Sekretari Besai Gempung Parti Sarawak (GPS) Datuk Seri Alexander Nanta Linggi nyemetak madah, pemanis numbuhka Perintah Penyerakup meseti ditan nentu ke sukung meruan entara gempung nya.
“Anang sesekali Malaysia penuh enggau semaya manis ba pun tang pengujung iya nadai reti,” ku iya.
Nanta mansutka jaku nya ba Konvensyen Nasional Perintah Penyerakup, ditu kemari.
Nangkan nya, iya ke mega Menteri Kereja Raya ngarapka rayat Malaysia meri awak ngagai Perintah Penyerakup nentu ke pemansang menua enggau pengelantang rayat dijaga ba baruh pegai Menteri Besai, Datuk Seri Anwar Ibrahim.
Ngelansa pasal madani ari sukut Sarawak, Nanta madah, GPS keran nyaga penegap politik ngambi perintah nengeri ulih betatika pengelantang rayat.
Ku iya, konsep Malaysia Madani meseti dikemeran rayat Sarawak pupu bansa.
“Taja idup pupu bansa tang tetap beserakup, ‘Sarawak Dikenulu’, ‘Sarawak ungkup rayat Sarawak’ nya entara prinsip diterenak kenyau ari suba ti nempa semangat bebaik begulai ngemansang Sarawak.
“Nyadi rayat Malaysia, kitai mega ulih bepegai ngagai semangat ‘Malaysia Dikenulu’ lalu nya pemadu manah ungkup menua kitai,” terang iya.
