KUCHING: Mensia mayuh dipinta meri kerejasama nyaga pemeresi kandang Jematan Batang Lupar 1 nengah chara muai uras enggau betul dikena nentuka nama Sarawak terus dijaga.
Sapit Premier Sarawak ti mega Menteri Infrastruktur enggau Pemansang Penyangkai Kapal, Datuk Amar Douglas Uggah Embas madah, Jematan Batang Lupar 1 ti udah tembu nya udah nerima timbal ti chukup manah ukai semina ari komuniti di Sarawak tang mega ari luar nengeri tu.
“Majak mayuh orang datai ngelawa jematan nya ungkup tuju pejalai deka meda rampa menua ari jematan kenyau ari ulih ditengah mensia mayuh.
“Aku ngelalau mensia mayuh nentuka semua uras dibuai ba endur ti patut ngambi enda nyadi isu ti tau ngamahka nama Sarawak,” ku iya.
Uggah bejaku munyi nya ba aum pemberita serimbai aum besai Pengerami Ngintu Gawai Dayak 2026 Sarawak ba Kompleks Kunsil Nengeri (DUN) Sarawak ditu, kemari.
Dulu ari nya, iya meri pengaga ati ke pengeran Premier Sarawak, Datuk Patinggi Tan Sri Abang Johari Tun Openg nentuka projek jematan nya ulih tembu digaga nyengkaum ari sukut belanja.
Ku iya, Opis Kereja Raya (JKR) benung ngadu pengawa nyendia perengkaguna endur muai uras sereta deka terus matau gaya ba endur ngelingi nya.
Iya madah, perintah deka nentuka endur ngelingi jematan nya seruran beresi ngambi ulih narit ati bala temuai laban diatu jematan nya siti ari palan ti udah mayuh matak temuai.
“Rambau pengerami Gawai tu tadi, bisi temuai ari Singapore madah kediri bisi datai ngagai jematan nya laban sida deka meda gaya Jematan Batang Lupar ti pemadu panjai nya.
Ku iya, jematan nya bisi pengelebih nyadi palan dagang temuai ti beguna sereta enda patut ditempaya enggau pekara ti tau ngeruga nama Sarawak.
“Aku minta kerejasama semua rayat enggau komuniti nyaga enggau manah laban tu reta Sarawak.
“Jaga enggau manah ngambi terus nyadi pekara ti ngemegah ati kitai jemah,” ku iya.
Iya mega ngelalau penguna ti deriba ba jematan nya bejimat sereta anang deriba kelalu laju.
Ku iya, infrastruktur mensia mayuh nya digaga dikena ngemuntang pejalai peranak menua mindah ke bukai ke alai tetiap penguna meseti ngemerat nyawa diri empu nengah chara seruran nyaga pengelikun maya deriba.
