BINTANGOR: Pekara pengelikun ba kebun sawit meseti semampai dikemerat dikena nagang penusah enggau nyaga pengelantang pengereja pengawa.
Tuai Balai Bomba enggau Penyah Penusah (BBP) Bintangor, Nicholas Belulin madah, dikena staf pengereja bejejaga, sida meseti disikap penemu bomba ngambi sedia napi sebarang penusah enda disadang nyadi.
“Kebun sawit nya sektor ti beguna ngagai ekonomi tang mega mudah napi penusah enda disadang nyadi.
“Nya kebuah, atur pengelikun penusah angus meseti dipejalai dikena nyelamat nyawa, reta tengkira enggau rampa menua,” ku iya lebuh ngatur kimpin pengelikun penusah angus di Sarawak Plantation Berhad (Tulai) ditu.
Ku iya, penusah angus di kebun sawit ulih nyadi ketegal mayuh kebuah baka gaya hari angat, mesin enggau nunu babas.
Tambah mega ku iya, penusah nya ulih nyerarai enggau jampat sereta mai pengerusak besai.
“Enti penusah angus nya agi ulih dipadam, kena kereban pengerara api dikena madamka api sereta nentuka chara ngena kereban pengerara api enggau betul.
“Seraya genap staf meseti semampai meri penyedar enggau penemu pasal pengelikun penusah angus nengah licha, latih enggau kimpin penyedar ngagai sida,” terang iya.
Program tu udah dipasuk 52 staf opis enggau pengereja kebun sawit nya.






