MIRI: Jaku Iban meseti seruran dijaga laban nya pesaka bansa enggau pengawa ngena jaku nya meseti dikerembai ngagai rebak biak.
Kaban Kunsil Nengeri (ADUN) Samalaju, Datuk Majang Renggi madah, Jaku Iban mega meseti dijaga ngambi meruan dikeingat kelebih agi ba rebak baru.
“Semua kitai sedar, aki ini kitai kelia chukup ngemeratka jaku bansa kitai kelebih agi Jaku Iban ngambi terus dikena enggau dikerembai.
“Jaku ukai semina kereban komunikasyen tang mega lambang identiti bansa baka sempama dikelala buah ari langgu, dikelala daun ari kayu, dikelala basa ari penyiru, dikelala bansa ari jaku,” ku iya.
Majang mansutka jaku nya lebuh bejadi Pekit Pidato Jaku Iban Trofi Datuk Dr Nuing Jeluing Kategori Sekula Sekondari Bagi Menua Miri, ditu ensanus. Nambah ke nya, ku iya, Jaku Iban diatu mayuh berubah enggau mansang nipakka juluk negapka agi jaku nya ngambi ulih terus relevan ba jeman globalisasyen.
“Tu belabuh ari pengawa ngeluarka Diksionari Jaku Iban-Inggeris diberi nama A Sea Dayak Dictionary ti ditulis Howell enggau Bailey ba taun 1900 lalu kenyau ari nya, jaku tu dipeda terus mansang enggau ulih dipeda dalam bup malin ari Janang Ensiring, Jantan Umbat enggau Dr Robert Menua Salleh ba taun 2011
. “Pia mega, Jaku Iban diatu mega udah diajar ba sekula belabuh ari sekula primari nyentuk pelajar tinggi lalu apin lama, jaku Iban mega ulih ditemu enggau dibacha nengah Google Translate,” terang iya.
Kelimpah ari nya, Majang mega andal nengah sukung meruan ari bemacham raban, Jaku Iban deka terus maju enggau ulih bediri sebaka enggau jaku bukai.
“Yayasan Tun Jugah enggau Yayasan Kebudayaan Dayak entara raban ti beempu tanggungpengawa besai ngintu enggau ngemansang Jaku Iban.
“Tu mega seraris enggau tanggungpengawa dipejalai Gerempung Dayak Miri (DAM) ngatur program besai dikena ngansah pengelandik Jaku Iban ba rebak biak.
“Nya alai, pengawa ngangkatka Jaku Iban ukai semina tanggungpengawa siti raban tang mega meseti dipejalai semua bansa Iban laban mayuh bansa bukai udah maju nengah pengawa nyaga jaku sida nyengkaum ngena jaku nya ba pengidup besehari-sehari,” ku iya nyemetak.
