PADAWAN: Sepanjai jalai ari jalai keliling Kota Padawan nyentuk Rumah Jil Puncak Borneo diatu deka tampak maya malam hari berebak ari penembu pengawa masang 150 unit lampu jalai LED 120 watt dia.

Chairman Kaunsil Mengeri Padawan (MPP), Tan Kai madah, pengawa masang lampu jalai LED ti beungkus RM980,000 nya dipelanja Opis Kereja Raya (JKR).

Iya madah, projek nya dipejalaika raban SESCO ti deka nerangka palan nya dikena nambah tikas pengelikun mensia mayuh kelimpah ngelimat kuasa karan.

“Projek pemungkal tu seraris enggau pangku pengawa MPP ba baruh Pelin Atur Mengeri Gadung (GCAP).

“Tu dikena meransang kuasa karan ti efisyen agi nyengkaum pengawa ngena lampu ti ulih nyimatka kuasa karan baka lampu jalai LED.

“Nengah pengawa ngena teknologi LED pemadu baru, MPP nyelinting meri penampak ti manah enggau kurang ngena kuasa karan.

“Nya alai, tu mantu nyapai juluk ti deka ngurangka pengawa ngelepaska karbon enggau gas rumah gadung ba mengeri,” ku iya.

Tan Kai mansutka jaku nya rambau aum pemberita pengudah ngabas taba projek lampu jalai LED nya ditu, malam ensanus.