KUCHING: Penguna jalai alun dilalau ngena jalai puntang berindik ari penyadi tanah tusur ti nyadi enda jauh ari Kampung Haji Baki di Jalai Kuching-Bau ditu, malam kemari.
Tuai Balai Bomba enggau Penyah Penusah Kota Sentosa, Jankey Jikat madah, penusah nya nyadi di entara Tanah Pendam Anglikan enggau simpang tama ke Kampung Haji Baki.
Iya madah, tanah tusur berengkah ditemu urung pukul 11 malam sebedau majak raya ngujungka sekeda jalai muak ke kiba nuju ke Bau tusur sereta ulih ngeruga pengelikun penguna jalai alun.
“Tanah tusur tu chukup berisiko lalu ulih ngeruga pengelikun semua entukar nyengkaum motosikal.
“Taja pen motosikal agi ulih nengah jalai tu naka diatu tang tu tetap ulih ngeruga pengelikun,” ku iya lebuh dirandau pemberita ba endur nya.
Nya alai, mensia mayuh kelebih agi penguna jalai alun ari Kuching ke Bau tauka ari Bau ke Kuching dilalau nengah jalai puntang dikena nyeliahka diri ari sebarang pekara ti enda disadang nyadi.
“Sekeda jalai puntang ti ulih ditengah iya nya Jalai Kampung Haji Baki, Jalai Stephen Yong tauka Jalai Batu Kawah.
“Pun penyadi tanah tusur nya agi dipansik raban bekuasa bekaul lalu pengawa matau pengelikun di palan tu agi dipejalai,” ku iya.
Mensia mayuh dipinta nitih ke atur pengelikun enggau papan tanda gerah ti dipasang dia sereta bejimat lebuh betengahka jalai ti berisiko kelebih agi lebuh gaya hari enda manah.
