KUCHING: Jalai Penyambung 1 Simpang Selangau ba Jalai Besai Pan Borneo ti bisi jai ketegal penusah bebadi ngaul sebuah lori tangki minyak sawit ti ngelantak struktur jalai nya ngujungka sekeda panel dinding pechah.
Menteri Kereja Raya, Datuk Seri Alexander Nanta Linggi madah, nitih ke penerang teknikal ba palan nya, bekau ari penusah bebadi nya jalai nya ditutup enda lama ungkup pengelikun penguna jalai alun bukai.
“Aku nemu isu tu udah nerima perati mensia mayuh nyengkaum ba media rama, kelebih agi laban gaya nya bekaul enggau pengelikun penguna Jalai Raya Pan Borneo.
“Kereja ngaduka jalai tu meseti diadu ngena chara ti likun, berurun sereta enda ngeruga penglikun penguna jalai alun.
“Kelimpah ari nya, kitai mega ngaduka struktur nentuka endur tu tegap ngambi enda kena ampuh,” ku iya.
Nanta mantaika pekara tu ba media rama iya empu pengudah ngabas Jalai Penyambung 1 Simpang Selangau ditu, ensanus.
Ku iya, jalai ti enda kena empas deka dibuka berenggat pengudah dituku likunlalu jalai ti agi jai deka ditutup dulu nyentuk pengawa ngadu jalai tembu semua.
Berindik ari nya, iya minta semua raban ti bekaul ngemeratka tiga pekara iya nya nentuka pengelikun penguna jalai alun enda dikeruga, matau enggau silik tusun kereja nyeruri ngambika nadai laun sereta meri penerang ti nyemetak ngagai mensia mayuh bekaul jalai alternatif sereta status pengawa nutup jalai nya.
Nanta mega madah, pengawa nutup jalai tu endang bisi meri penusah ngagai penguna, kelebih agi peranak enggau sida ti suah nengah jalai Bintulu–Mukah–Sibu, tang nyemetak madah ke sukut pengelikun meseti dikemerat sebedau sebarang jalai dibuka baru.
Iya mega meri terima kasih ngagai mensia mayuh laban terus meri timbal dalam mantu perintah enggau ejensi ti bekaul bejalaika pengawa enggau jampat agi.
