JAGUH renang para menua, Jamery Siga (S5) diatu nitihka taga jam ke diberi pematih iya dalam neruska latih ninting hari.
Semua nya dititihka berindik ari Atur Tagang Pemindah (PKP) ke benung dipejalai jam diatu.
“Latih tetap dipejalai baka selama semina aku nitihka pengasuh taga jam ari pematih.
“Pia mega aku seruran nganjung ripot latih diri ngagai iya (pematih) ninting kali udah abis belatih,” ku iya madah ngagai Suara Sarawak kemari.
Peranak asal Kampung Kuala Mendalam, Ulu Mendamit, Limbang nya madah iya nadai ngasaika taga jam ke udah diletak pematih nya ngenusah iya.
Kenu ku Jamery, atur latih ke dititih diatu endang kala diasai iya maya belatih kenyau ari taun nyin kemari.
Nya alai, nadai penanggul ba iya bejalaika tanggung pengawa nya.
Jamery endang siku ari penyemerai ke pemadu mayuh peneleba, iya diatu benung nyikap diri napi pekit besai ba renggat Asia enggau dunya.
Empat ari lumba ke pemadu dikerindu iya suah dipasuk iya baka Lumba Nyemerai 50 meter ngati kediri, 50 meter gaya kesulai, 100 meter ngati kediri enggau 200 meter ngati kediri.
