BINTULU: Jasa enggau budi ex-kaban Polis DiRaja Malaysia (PDRM) deka seruran dibasa enggau diaku taja pen sida udah pinchin.

Menteri ba Opis Premier Sarawak, Datuk John Sikie Tayai madah, jasa ex-kaban PDRM tetap diaku nadai ngira dini endur sida gawa ngelama tu.

Kebuah pia, ku iya, nya dikena nyaga pengelantang komuniti enggau pengelikun menua terus dijaga.

Iya madah, perintah nemu pemar enggau penanggul ditapi raban pengelikun rambau sida bejalaika pangku pengawa diri.

Ku iya, jasa bala ex-polis nya patut dikenang semua rayat ba menua tu kelebih agi penyanggup sida ninggalka ruang bilik diri ketegal bejalaika tanggungpengawa ngagai menua.

“Ambi ke chunto, baka ba kes tama belalai Lahad Datu, Sabah ba taun 2013 urung 10 taun ti udah.

“Ba kes tu, bisi 12 bujang berani menua bebadi nyawa ketegal deka ngetanka menua.

“Kes tu udah muka mata enggau meri penyedar ngagai komuniti ba menua tu pemesai jasa bala bujang berani kitai ngetanka sereta nyaga pengelikun enggau pengelantang menua kitai.

“Nya alai, kitai patut beterima kasih enggau ngaku jasa sida ngelama tu taja pen sida udah ngetu gawa tauka pinchin,” ku iya.

Sikie mansutka jaku nya rambau bejadi Pengerami Makai Lemai Pengawa Betemu Baru Ex-Polis Sarawak sereta ngelanchar Turu Pengintu Pengelantang Gerempung Ex-Polis Malaysia Nengeri Sarawak ba Hotel Li-Hua ditu, malam ensanus.