BAU: Jasa besai Raban Pengelikun Komanwel ke kala gawa nyaga Sarawak maya jeman Konfrontasi Indonesia-Malaysia seruran dikenang peranak menua.
Sapit Menteri Pengangkut Sarawak (Sungai enggau Tasik) ke mega Kaban Kunsil Nengeri (ADUN) Tasik Biru, Datuk Henry Harry Jinep madah, pangku pengawa raban pengelikun datai ari raban British, Australia, New Zealand, Gurkha enggau Malaysia beguna endar ba pengawa nyaga penuduk kandang menua enggau kedaulatan Sarawak.
“Enam puluh dua taun ke udah, Batalion Ke-3 enggau Ke-4, Royal Australian Regiment udah nurun gawa ba kampung enggau tanah Borneo tu.
“Taja dianjung gawa jauh ari menua diri sereya napi pemar batang tubuh enggau runding, pemerani enggau pengeliat ati sida tu mantu mulaika pengelikun, nyamin kedaulatan Sarawak sereta nyaga rayat ari dikeruga penyelawai Indonesia,” ku iya.
Iya nyebut jaku nya lebuh ngulu Pengerami Makai Lemai ‘Reunion’ Operation Hornbill 26 – Stass Chapter di Balai Mayuhguna Kampung Krawong Stass, ditu Hari Satu.
Datuk Henry madah, entara legasi besai raban Australia ngagai peranak menua iya nya ngaga jalai keterubah ke tau ditengah entukar ari Bau ke Kampung Stass digaga Kor Injinia Soldadu Australia ba taun 1965.
Iya madah, peranak di Bau, lebih agi Kampung Stass, Kampung Serikin enggau Kampung Gumbang, mengkang ingat enggau ngenang jasa raban nyaga pengelikun ke kala gawa di menua nya.
Ku iya, jasa sida nya ngaul raban ke bebadi nyawa lebuh 23 raban soldadu Australia enda pulai idup ari Sarawak, agi tubah veteran ke pulai mai tubuh ke timpang enggau kusut runding ketegal beperang.
“Entara ke kala endur beperang nyengkaum Perang Sungai Kumba, Perang Serikin-Babang enggau Perang Lotar-Kindau, kelimpah perang mit ke bukai,” ku iya.
Ba pengawa nya, Datuk Henry ngemendarka agih belanja RM100,000 dikena ngaga Tiang Pengingat Konfrontasi di Kampung Stass.
Bela disua chek agih belanja Unit Pekara Pengarap Bukai (UNIFOR) penyampau RM240,000 ngagai Gerija St. Mark Stass enggau RM200,000 ngagai Gerija Borneo Evangelical Mission (BEM) Serasot. — EDISI UKAS
