KUCHING: Perintah Sarawak nengah Kepala Menteri Datuk Patinggi Abang Johari Openg udah ngemendarka pengawa meli 24 unit lori tangki ai ngagai Opis Bekal Ai Menua Pesisir(JBALB).
Pengawa tu ngemuntangka piak JBALB bejalaika operasyen maya musim hari besai enggau musim kemarau mutarka penanggul bekal ai ba sekeda genturung pendiau enggau menua.
Nengah penerang kemari madahka nyentuk 8 Mei taun tu, piak JBALB udah nerima 12 unit lori tangki ai ti deka dikena genap Unit JBALB Bagi Menua.
Nangkan nya, 12 unit lori tangki ai ke bukai deka diterima piak JBALB Sarawak dalam tengan enggau ujung bulan Mei 2019 lalu genap unit deka nerima dua unit lori tangki ai, ku penerang nya.
Berebak enggau nya, pengawa Nyerahka Lori Tangki Ai JBALB udah dipejadika Menteri Utiliti Sarawak, Datuk Seri Dr. Stephen Rundi Utom, bepalan di Laman Besai Indu Opis JBALB Sarawak, Kuching apin lama ke udah.
Bisi datai rambau pengawa tu Menteri Muda Bekal Ai Sarawak Datuk Liwan Lagang, Sekretari Mendam Opis Menteri Utiliti Sarawak Datuk Ir. Alice Jawan Empaling, Direktor JBALB Sarawak Ir Chang Kuet Shian, sereta bala kaban Opis Menteri enggau JBALB Sarawak ke bukai.
Opis Menteri Utiliti mega meri terima kasih ngagai Opis Kereja Raya (JKR) Sarawak laban udah meri kerejasama rat ngagai JBALB Sarawak nentuka lori tangki ai ulih diterima bulan April enggau Mei 2019.
Berindik ari nya Opis Menteri Utiliti pechaya piak JBALB Sarawak deka seruran chakah gawa ngintu pengelantang mensia mayuh sereta bala penguna meruan nerima bekal ai beresi.
