KUCHING: Jelatung Esplanade Telaga Air ti sebedau tu tekerap enggau ngeruga pengelikun peranak kelebih agi nembiak diatu tembu diseruri enggau ulih ditengah baru.
Projek nyeruri Jelatung Kayu Tebelian Kampung Telaga Air nya diserah Opis Parit enggau Entali Ai (DID) Sarawak ngagai Komiti Pemansang kemari lalu pengawa nya dikemata pengari Opis Parlimen P193 Santubong.
Menteri Pemansang Indu, Ruang Bilik enggau Komuniti, Datuk Seri Nancy Shukri madah, pengawa nyeruri nya dipejalai berindik ari sebana enggau matau jelatung nya sebedau tu ti udah lama enggau repuk.
“Kena 16 November 2025, aku udah ngabas Jelatung Esplanade Telaga Air ti tekerap enggau ngeruga pengelikun peranak kelebih agi nembiak ti nurun ke sekula.
“Lebuh nya, mayuh sebana diterima lalu kitai mega meda jelatung kayu nya nyau enda likun agi.
“Nengah penembu projek nyeruri tu ukai semina meri pemaik ngagai peranak Kampung Telaga Air, tang mega nyengkaum peranak di Kampung Sungai Aur, Kampung Sibu Laut enggau Kampung Mersan,” ku iya.
Nancy ti mega Kaban Parlimen Santubong mega madah, entara penguna ti suah betengahka jematan nya baka nembiak sekula, pengajar sereta orang berikan.
Nya kebuah, iya meri terima kasih ngagai semua ejensi teknikal bekaul kelebih agi Opis Parit enggau Entali Ai (DID) sarawak sereta raban kunteriktor ti udah bejalaika projek nya.
“Inisiatif tu nentuka fasiliti ti menyana enggau likun agi deka terus dikenati ke pengelantang rayat Santubong,” ku iya.
